Izraeli po e shkatërron veten pa kthim

Chris Hedges – shkrimtar dhe gazetar ushtarak amerikan

Shkatërrimi i Gazës nga Izraeli nuk ka të bëjë vetëm me spastrimin etnik, por me zhdukjen e një populli, të një kulture dhe të një historie që zbulon gënjeshtrat mbi të cilat u justifikua krijimi i shtetit izraelit.

Ndërsa Izraeli vazhdon të kryejë një listë mizorish me tipare naziste ndaj palestinezëve, përfshirë urinë masive, ai po përgatitet për një krim tjetër: shkatërrimin e qytetit të Gazës, një prej qyteteve më të lashta në botë.

Makineri të rënda dhe buldozerë të blinduar po shembin qindra ndërtesa. Kamionë betoni po mbushin tunelët me çimento. Tanket dhe avionët izraelitë po bombardojnë lagjet, duke shtyrë mbetjet e popullsisë drejt jugut.

Do të duhen muaj për ta kthyer Gazën në një shesh bosh. Nuk kam dyshim – thotë Hedges – se Izraeli do të ndjekë modelin e gjeneralit nazist Erich von dem Bach-Zelewski, i cili mbikëqyri shkatërrimin e Varshavës, e më pas vdiq në burg. Historia mund të përsëritet.

Ndërsa tanket përparojnë, palestinezët ikin. Lagje si Sabra dhe Tuffah boshatisen. Uji i pastër është i pakët dhe Izraeli planifikon ta presë krejtësisht në veri. Ushqimi është i rrallë dhe i shtrenjtë – një thes mielli arrin deri në 22 dollarë për kilogram, ose jetën tënde.

Një raport i publikuar të premten nga organizata ndërkombëtare IPC (klasifikimi i fazave të sigurisë ushqimore) konfirmoi për herë të parë ekzistencën e urisë në qytetin e Gazës.
Raporti thotë se mbi 500 mijë persona përballen me “uri, varfëri dhe vdekje”, dhe se kushtet katastrofike do të shtrihen së shpejti në Deir el-Balah e Khan Younis. Deri tani kanë vdekur rreth 300 persona nga uria, mes tyre 112 fëmijë.

Udhëheqësit evropianë dhe amerikanë – Biden e Trump përfshirë – tregojnë se mësimi i vërtetë i Holokaustit nuk është “kurrë më”, por “ne nuk na intereson”. Ata janë bashkëfajtorë të plotë të gjenocidit. Disa mjaftohen me fjalë “tronditjeje” e “dhimbjeje”, disa e dënojnë urinë e organizuar izraelite, pak të tjerë thonë se do të njohin shtetin palestinez.

Por ky është teatër hipokrit – një mënyrë që këta udhëheqës të pretendojnë më vonë se ishin në anën e drejtë të historisë, ndërsa në fakt armatosnin, financonin dhe mbronin vrasësit, duke ndëshkuar e heshtur ata që ngritën zërin kundër masakrës.

Izraeli flet për “pushtimin e Gazës”. Por kjo është mashtrim. Qëllimi nuk është pushtimi, por shkatërrimi total. Nga Gaza nuk do të mbetet veç grumbuj rrënojash – një peizazh hënor i boshatisur nga palestinezët – që do të bëhet bazë për kolonitë e reja hebraike.

Ministri izraelit i Financave, Bezalel Smotrich, tha hapur në një konferencë: “Gaza do të shkatërrohet krejtësisht. Civilët do të dërgohen në jug, në një zonë humanitare pa Hamas, dhe prej andej do të fillojë shpërngulja e tyre masive drejt vendeve të tjera.”

Chris Hedges kujton kujtimet e tij nga jeta në Gaza: zyra e tij në qendër të qytetit, shtëpia e miqve ku pinte çaj me një refugjate të moshuar nga Safadi, kafenetë buzë detit dhe shokët që sot ose janë në mërgim, ose të vdekur nën rrënoja. Gjithçka është zhdukur.

Ndërtesa e Kalasë së Pashës nga shekulli XIII, xhamia e vjetër e mamlukëve nga viti 1387, Xhamia e Madhe Omari, varrezat romake e britanike, universitetet, arkivat, spitalet, kishat, shtëpitë – të gjitha janë shkatërruar. Edhe porti i lashtë i Anthidonit (1100 p.e.s.), ku ndalnin babilonasit, persët, grekët, romakët e osmanët, është kthyer në hi.

Hedges thekson: shkatërrimi i Gazës nuk është vetëm krim kundër palestinezëve, por krim kundër trashëgimisë kulturore dhe historike të mbarë njerëzimit.

Ai e lidh këtë me përvojën e tij në Bosnjë: serbët shpërthyen xhami, shuan kujtesën, ndaluan njerëzit të flisnin për të kaluarën. Sot, Izraeli po bën të njëjtën gjë në Gaza – për të zhdukur historinë dhe për ta zëvendësuar me mitet e tij.

Shuarja e kujtesës, thotë Hedges, është një luftë kundër së vërtetës. Një shoqëri që fshin kujtesën e vet ngurtësohet, bëhet e paaftë të reformohet dhe përfundimisht shkatërron vetveten.

Përfundimi i tij është i prerë:
“Izraeli nuk po shkatërron vetëm Gazën… Izraeli po shkatërron edhe veten.”