Izraeli nis sulme të reja ajrore në mbarë Gazën

Ushtria izraelite ka vazhduar shkeljen e marrëveshjes së armëpushimit të 10 tetorit, duke rifilluar bombardimet ajrore dhe artilerike në pjesë të ndryshme të Rripit të Gazës, raportoi të martën agjencia palestineze e lajmeve WAFA.

Sipas WAFA-s, avionët luftarakë izraelitë kryen një sulm ajror mbi qytetin Beit Lahia në veri të Gazës. Njëkohësisht, avionë të tjerë izraelitë goditën një zonë në lindje të kampit të refugjatëve Maghazi.

Në Gazën qendrore, automjete ushtarake izraelite hapën zjarr të rëndë me mitraloz në lindje të Deir al-Balahut.

Artileria izraelite bombardoi gjithashtu pjesën perëndimore të qytetit Rafah në jug të Gazës, ndërsa u raportua edhe për të shtëna me armë zjarri drejt pjesëve lindore të qytetit, bëri të ditur WAFA.

Këto shkelje izraelite vijnë në kuadër të një modeli më të gjerë sulmesh gjatë dy muajve të fundit, gjatë të cilëve forcat izraelite kanë kryer në mënyrë të përsëritur sulme ajrore dhe artilerike, si dhe shembje banesash në mbarë Gazën.

Shtim i bastisjeve izraelite në Bregun Perëndimor të pushtuar

Njëkohësisht, janë shtuar bastisjet, arrestimet dhe të shtënat ndaj palestinezëve në Bregun Perëndimor të pushtuar, raportoi WAFA të martën në mëngjes.

Në Kudsin Lindor të pushtuar, forcat izraelite bastisën qytetin Silwan, në jug të kompleksit të Xhamisë Al-Aksa, duke shembur një shtëpi palestineze në lagjen Al-Bustan.

Pranë murit ndarës në Al-Ram, në veri të Jerusalemit, një palestinez u qëllua në këmbë teksa përpiqej të shkonte në vendin e punës dhe u transferua në spital nga Shoqata Palestineze e Gjysmëhënës së Kuqe.

Sipas WAFA-s, trupat izraelite arrestuan gjithashtu 15 palestinezë gjatë një bastisjeje në Tuqu’, në juglindje të Betlehemit, dhe kryen inkursione në al-Ubeidiya, Dar Salah dhe al-Shawawra. /TRT World/