Izraeli miraton ‘mbi 80’ plane të vendbanimeve të paligjshme në Bregun Perëndimor dhe në Jerusalem

Organizata për Çlirimin e Palestinës (PLO) ka zbuluar se Izraeli ka miratuar më shumë se 80 plane të vendbanimeve të paligjshme në Bregun Perëndimor të pushtuar dhe Jerusalemin Lindor që nga fundi i vitit 2022.

Këto miratime përfshijnë dhjetëra mijëra njësi vendbanimesh, sipas një raporti të publikuar të shtunën nga Byroja Kombëtare e PLO për Mbrojtjen e Tokës dhe Rezistencën e Vendbanimeve.

Raporti thekson një zgjerim të shpejtë dhe të paprecedentë të vendbanimeve izraelite në tokën palestineze, të lehtësuar nga vendimet e qeverisë dhe urdhrat ushtarakë.

Ushtria izraelite thuhet se ka krijuar “zona tampon” rreth shumë prej këtyre vendbanimeve, duke shkelur fshatrat fqinje palestineze nën maskën e ofrimit të sigurisë për kolonët.

Vlerësimet izraelite tregojnë se më shumë se 720,000 izraelitë tani jetojnë në qendra të paligjshme të vendbanimeve në Bregun Perëndimor të pushtuar, duke përfshirë Jeruzalemin Lindor.

Zgjerime ‘ilegale’

Ndërtimi i vendbanimeve është përshpejtuar ndjeshëm që kur qeveria e krahut të djathtë të Izraelit, e udhëhequr nga kryeministri Benjamin Netanyahu, erdhi në pushtet në dhjetor 2022.

Komuniteti ndërkombëtar, përfshirë OKB-në, i konsideron këto vendbanime të paligjshme sipas ligjit ndërkombëtar.

OKB-ja ka paralajmëruar vazhdimisht se zgjerimi i vazhdueshëm i vendbanimeve kërcënon qëndrueshmërinë e një zgjidhjeje me dy shtete, një kornizë që shihet si kyç për zgjidhjen e konfliktit izraelito-palestinez.

Në një zhvillim të rëndësishëm ligjor në korrik, Gjykata Ndërkombëtare e Drejtësisë (GJND) nxori një vendim që e shpalli “të paligjshëm” pushtimin prej dekadash të territoreve palestineze nga Izraeli. Gjykata bëri thirrje për evakuimin e menjëhershëm të të gjitha vendbanimeve ekzistuese në Bregun Perëndimor dhe Jerusalemin Lindor.

Pavarësisht dënimit global dhe thirrjeve për ndalimin e aktivitetit të vendbanimeve, Izraeli vazhdon përpjekjet e tij për zgjerim, duke thelluar tensionet në rajon. /TRT World/