Izraeli bllokon vizitën e planifikuar të ministrave të jashtëm arabë në Ramallah
Zyrtarët izraelitë kanë konfirmuar se Tel Avivi ka penguar një vizitë të planifikuar nga një delegacion i ministrave të jashtëm arabë në Ramallah, ku ata kishin për qëllim të diskutonin mbështetjen për krijimin e një shteti palestinez, raportoi e përditshmja Yedioth Ahronoth, transmeton Anadolu.
“Takimi i planifikuar i ministrave të jashtëm arabë në Ramallah për të promovuar krijimin e një shteti palestinez është i papranueshëm”, citoi e përditshmja një zyrtar izraelit të paidentifikuar.
“Izraeli nuk do të marrë pjesë në asnjë hap që synon të dëmtojë sigurinë e tij”, ka shtuar zyrtari.
Të premten, Ahmad Majdalani, një anëtar i Komitetit Ekzekutiv të Organizatës për Çlirimin e Palestinës, tha për Anadolu se një delegacion i ministrave arabë pritej të mbërrinte në Ramallah të dielën.
Delegacioni përfshinte ministrat e jashtëm të Arabisë Saudite, Egjiptit, Jordanisë, Katarit dhe Emirateve të Bashkuara Arabe. Vizita, e cila ishte shtyrë nga një datë më e hershme, ishte planifikuar të përcillte një mesazh mbështetjeje politike për udhëheqjen palestineze.
Sipas Majdalanit, vizita do të përfshinte një takim me presidentin palestinez Mahmoud Abbas dhe zyrtarë të tjerë të lartë. Gjithashtu, ajo synonte të shprehte kundërshtimin e vendeve arabe dhe myslimane ndaj veprimeve izraelite në Gaza dhe Bregun Perëndimor.
Delegacioni, pjesë e një komiteti ministror të formuar në samitin arabo-islam në Riad, po përgatitet gjithashtu për një konferencë ndërkombëtare paqeje të planifikuar të zhvillohet në mesin e qershorit në New York, i bashkëudhëhequr nga Arabia Saudite dhe Franca. Konferenca pritet të përqendrohet në ringjalljen e përpjekjeve drejt një zgjidhjeje me dy shtete.
Që nga fillimi i sulmeve izraelite në Rripin e Gazës në tetor 2023, të paktën 972 palestinezë janë vrarë dhe më shumë se 7.000 janë plagosur në sulmet e ushtrisë izraelite dhe kolonëve të paligjshëm në gjithë Bregun Perëndimor të pushtuar, sipas Ministrisë palestineze të Shëndetësisë.
Gjykata Ndërkombëtare e Drejtësisë deklaroi korrikun e kaluar se pushtimi i gjatë i territoreve palestineze nga Izraeli është i paligjshëm dhe bëri thirrje për evakuimin e të gjitha vendbanimeve kolone në Bregun Perëndimor dhe Kudsin Lindor.
