Izet Mexhiti: BDI nuk di të bëjë opozitë, po kthehet me skenarë destabilizimi dhe urrejtje ndëretnike

Zëvendëskryeministri i parë, Izet Mexhiti, ka reaguar ashpër ndaj qasjes së BDI-së në opozitë, duke i akuzuar drejtuesit e saj se po përpiqen të rikthehen në pushtet përmes destabilizimit dhe gjuhës së urrejtjes.

“BDI nuk di të bëjë opozitë, prandaj po përpiqet të rikthehet me skenarë destabilizues dhe urrejtje ndëretnike”, deklaroi Mexhiti në një postim në rrjetet sociale. Ai theksoi se këto skenarë po dirigjohen nga, siç e quajti, “shefi në arrati” i propagandës dhe lajmeve të rrejshme, i lidhur me nëntokën ruso-serbe të instaluar përmes bixhozit dhe kazinove që, sipas tij, i solli vetë BDI në vend.

Mexhiti renditi disa nga përpjekjet e dështuara të BDI-së për të minuar forcat e reja politike shqiptare:

• “Dështuan me Taravarin.”

• “Dështuan me Danella Arsovskën.”

• “Tani fajësojnë VLEN-in për çdo dështim të tyre.”

Ai akuzoi BDI-në për propagandë të vjetër që mundohet të shpikë fajtorë për gabimet e veta, duke përmendur disa shembuj konkretë:

• Balancuesin e hoqën vetë, por fajin ia lanë VLEN-it;

• Ligji për gjuhën shqipe mbeti i papërfunduar, dhe sërish VLEN u fajësua;

• Regjistrimi i mërgatës u bë me metodologji të propozuar nga vetë ata, por prapë VLEN mbetet “fajtore”.

“Ky është manuali i propagandës së vjetër: shpikje, përçarje dhe viktimizim,” theksoi Mexhiti. Në përmbyllje, ai theksoi se shqiptarët nuk u besojnë më “atyre që ikën nga drejtësia dhe kërkojnë të rikthehen përmes kaosit”.

“A e ndërton dot e ardhmja me mashtrime dhe frikë? Jo. Ajo ndërtohet me drejtësi dhe përgjegjësi,” përfundoi Mexhiti.