Italia përsërit thirrjen që Izraeli të ndalojë sulmet dhe të lejojë ndihmën humanitare në Gaza
Italia përsëriti sot thirrjen e saj ndaj Izraelit që të ndalojë sulmet ndaj Gazës dhe të lejojë ndihmën humanitare në enklavën e rrethuar palestineze, transmeton Anadolu.
“Edhe një herë i bëra thirrje Izraelit që të ndalojë operacionet ushtarake që përfshijnë civilë dhe të hapë menjëherë të gjitha kalimet për të lejuar hyrjen e ndihmës humanitare”, tha ministri i Jashtëm Antonio Tajani në X.
“Ne duam një armëpushim dhe lirimin e pengjeve: lufta në Gaza duhet të përfundojë”, tha ai.
Tajani njoftoi gjithashtu se 52 palestinezë, të afërm të personave të evakuuar nga Gaza në Itali për trajtim mjekësor, janë transferuar në Jordani.
Ata përfundimisht do të sillen në Itali, shtoi Tajani.
Në ditët e fundit, ushtria izraelite intensifikoi sulmet e saj ajrore në Gaza, duke vrarë më shumë se 500 palestinezë dhe duke plagosur qindra të tjerë.
Duke refuzuar thirrjet ndërkombëtare për armëpushim, ushtria izraelite ka ndërmarrë një ofensivë brutale kundër Gazës që nga tetori i vitit 2023, duke vrarë gati 53.600 palestinezë, shumica prej tyre gra dhe fëmijë.
Gjykata Ndërkombëtare Penale lëshoi urdhra arresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.
