Ish-roja e “kurthit të vdekjes” në Gaza: Kurrë nuk kam parë një nivel të tillë shkatërrimi e çnjerëzimi
Ish-roja e GHF-së, Anthony Aguilar, ka folur për Al Jazeera mbi taktikat “të neveritshme” dhe “të panevojshme” vdekjeprurëse që ai dëshmoi vetë në vendet e shpërndarjes së ndihmave të drejtuara nga kontraktori kontrovers i mbështetur nga SHBA-ja dhe Izraeli.
Ai shpjegoi se ushtria izraelite e kontrollon turmën “duke përdorur zjarr automatik nga mitralozët, predha artilerie, predha mortajash, dhe ndonjëherë zjarr tanku nga tanku Merkava kundër civilëve të paarmatosur, të uritur, grave, fëmijëve, dhe personave me aftësi të kufizuara”.
Kur kërkuesit e ndihmës lejohen të hyjnë në vendin e shpërndarjes, ata “lirohen në një valë të madhe, masive, të paorganizuar, në një panik të çrregullt”, ndërsa ushtria izraelite qëllon në këmbët e tyre, mbi kokat e tyre dhe ndonjëherë drejt turmës për t’i kontrolluar.
Ai gjithashtu përshkroi se si ushtria izraelite më pas qëllonte të ashtuquajtura “të shtëna paralajmëruese” ndaj palestinezëve duke përdorur mitralozë me rrip municioni.
“Në gjithë karrierën time ushtarake, 25 vjet shërbim në shumë zona lufte në botë, nuk kam parë askënd të përdorë një ‘të shtënë paralajmëruese’ nga një mitraloz me rrip municioni,” tha Aguilar.
“Kurrë nuk kam qenë dëshmitar i një niveli të tillë shkatërrimi, i një niveli të tillë çnjerëzimi të një popullsie, dhe i një përshkallëzimi të neveritshëm e të panevojshëm të dhunës kundër një popullsie të paarmatosur.” /Al Jazeera/
