Ish-kryeministri i Moldavisë dënohet për pastrim parash: Interpoli në Paris lëshon urdhër arresti
Zyra e Interpolit në Paris ka lëshuar një urdhër arresti ndërkombëtar për ish-kryeministrin moldav Vlado Filat, i cili u dënua me dy vjet burg në Francë për akuzat e pastrimit të parave të lidhura me korrupsionin, njoftoi Inspektorati i Përgjithshëm i Policisë moldave.
Gjykata në Francë i vendosi gjithashtu Filatit një gjobë prej 100,000 eurosh, raporton sot portali moldav Newsmaker.
Sipas hetuesve, midis viteve 2012 dhe 2014, Filat dhe ish-gruaja e tij blenë disa prona në Francë, përfshirë rajonin Haute-Savoie, përmes kompanive dhe ndërmjetësve, dhe besohet se kanë përdorur fonde nga një kompani kanadeze së cilës iu dha kontrata për të menaxhuar Lotarinë Kombëtare Moldave në vitin 2011, kur Filat ishte kryeministër.
Vendimi i gjykatës thotë se Filati “fshehu qëllimisht origjinën e parave” të fituara “si rezultat i korrupsionit, gjatë periudhës kur ai ishte në krye të qeverisë dhe supozohej të vepronte në interes të shoqërisë”.
Filati nuk u paraqit në seancën dëgjimore, kështu që gjykata lëshoi një urdhër arresti për të dhe e gjobiti, ndërsa ish-gruaja e tij mori një dënim me kusht prej 18 muajsh dhe një gjobë prej 150,000 eurosh.
Gjykata gjithashtu urdhëroi që ata të paguanin së bashku 10,000 euro dëmshpërblim moral shtetit të Moldavisë.
Filat, i cili është president i Partisë Liberale Demokratike të Moldavisë (LDPM), e quajti vendimin të motivuar politikisht, i hodhi poshtë akuzat dhe theksoi se kishte paraqitur një ankesë.
