I ftohti në Gaza detyron të zhvendosurit të kthehen te shtëpitë e shkatërruara për të gjetur rroba dimri

Palestinezë të zhvendosur që jetojnë në lindje të Gazës janë detyruar të kthehen në rrënojat e shtëpive të tyre të shkatërruara në qytetin Khan Younis, në jug të Rripit të Gazës, për të gjetur rroba dhe batanije që do t’i mbrojnë nga të ftohtit e acartë me fillimin e dimrit, raporton Anadolu.

Palestinezët shprehen se kur shkojnë te rrënojat e shtëpive të tyre, ata bëhen objektiv i ushtrisë izraelite dhe se ky kërkim për të gjetur mbrojtje nga i ftohti është shndërruar në një udhëtim të përditshëm që u rrezikon jetën.

Pavarësisht gjithë rreziqeve, të zhvendosurit vazhdojnë të kthehen në shtëpitë e tyre të shkatërruara nga sulmet izraelite, me shpresën për të gjetur gjësende për mbulimin e nevojave më elementare.

Lejimi i një sasie të kufizuar ndihmash nga Izraeli dhe vonesat në dërgimin e materialeve të domosdoshme për t’u ngrohur gjatë dimrit e kanë shtuar vuajtjen e palestinezëve. Veçanërisht fëmijët dhe të moshuarit janë grupet më të prekura.

Palestinezët që shkojnë te rrënojat shprehen se tendat ku banojnë nuk ofrojnë asnjë mbrojtje dhe se jetesa në tenda në kushtet e dimrit është pothuajse e pamundur.