Hapet sërish Muzeu i Luvrit në Francë pas grabitjes

Muzeu i famshëm botëror i Luvrit, në Paris të Francës, ku ndodhi një grabitje para disa ditësh ka rihapur dyert për vizitorët.

Sipas raportimeve në mediat e vendit, hyrja e vizitorëve në Muzeun e Luvrit rifilloi tre ditë pas grabitjes më 19 tetor, në të cilën hajdutët vodhën nëntë objekte historike, njëri prej të cilëve u gjet më vonë i dëmtuar.

Nga ana tjetër, administrata e Muzeut njoftoi se Galeria Apollo, e cila ishte cak i grabitjes, do të mbyllet deri në njoftim të mëtejshëm.

U vodhën objekte historike

Grabitja ndodhi mëngjesin e 19 tetorit në Muzeun e famshëm botëror të Luvrit në Paris, i cili pret mijëra vizitorë çdo ditë dhe ekspozon afërsisht 35 mijë vepra.

Nëntë objekte të paçmuara u vodhën nga Galeria Apollo, ku ishin ekspozuar xhevahiret e kurorës.

Kurora që i përkiste perandoreshës Eugenie, gruas së Napoleonit III, besohet se është hedhur nga hajdutët gjatë arratisjes së tyre.

Më vonë u gjet e dëmtuar jashtë muzeut. Grabitja zgjati shtatë minuta, me katër hajdutë që ikën me tetë xhevahire me vlerë historike.

Raporti paraprak i përgatitur tha se kishte vonesa “të vazhdueshme dhe të konsiderueshme” në pajisjen e muzeut me pajisje teknike që përputhen me standardet e sigurisë, duke krijuar një boshllëk sigurie.

Vlera e veprave të vjedhura vlerësohet në 88 milionë euro.