Hamilton piloton për herë të parë Ferrarin: Mirënjohës për dashurinë që kam ndier në Maranello

Pasditen e kësaj të mërkure, Ferrari publikoi një komunikatë ku jepte më shumë detaje mbi ditën e parë të Lewis Hamilton në një makinë Formula 1 të ekipit italian.

Shumë persona nuk donin ta humbisnin këtë moment, mes tyre Fred Vasseur, drejtues kryesor i ekipit, zëvendësi i tij, Jérôme d’Ambrosio, madje edhe nënkryetari Piero Ferrari (si dhe disa anëtarë të familjes së tij).

Pas daljes së parë në orën 09:17, mes mjegullës dhe shiut, që shpejt bëri xhiron e rrjeteve sociale, britaniku pati mundësinë të kthehej në pistë me gomat slick.

Ai realizoi xhiro të shpejta dhe testoi nisjet, ndërsa përshtatej me sistemet e SF-23.

Në total, ai bëri 30 xhiro në pistën e Fiorano, duke mbuluar 89 kilometra – sigurisht më pak sesa do të dëshironte, por këto teste me makinat e viteve të mëparshme janë të kufizuara në 1,000 kilometra dhe duhen menaxhuar me kujdes.
Pasi zbriti nga njëvendëshja, ai zhvilloi takimin e zakonshëm me inxhinierët dhe më pas u afrua me tifozët që qëndronin pranë pistës që nga orët e para të mëngjesit për ta përshëndetur.

“Kam pasur fatin të përjetoj shumë momente të para gjatë karrierës sime, por pilotimi e një makine Ferrari për herë të parë këtë mëngjes ishte një nga ndjesitë më të mira të jetës sime”, u shpreh Hamilton për përvojën e tij të parë në timonin e ‘Kokëkuqes’, e cila i riktheu emocione të harruara:

“Kur ndeza makinën dhe dola nga boksi, kisha një buzëqeshje të madhe në fytyrë.

Më kujtoi herën e parë kur provova një makinë F1; ishte një moment shumë emocionues dhe i veçantë, dhe ja ku jam, gati njëzet vjet më vonë, duke ndier sërish ato emocione”.

“E dija që nga jashtë sa pasionante është familja Ferrari, nga të gjithë anëtarët e ekipit deri te tifozët, por tani që e përjetoj vetë si pilot i Ferrarit, ka qenë mbresëlënëse.

Ky pasion rrjedh në gjakun e tyre dhe nuk mund të mos ndihesh plot energji. Jam shumë mirënjohës për dashurinë që kam ndier nga të gjithë në Maranello këtë javë.

Kemi shumë punë për të bërë, por mezi pres të filloj”, përfundoi anglezi, me një buzëqeshje që nuk iu largua gjatë gjithë ditës.