Guroret në “Shum” kanë turbulluar ujin e Strugës, dy kompani po gërmonin në afërsi të burimit
Duke ndërmarrë veprime hetimore me urdhër të Prokurorisë Themelore Publike të Strugës për të hetuar shkaqet e ndotjes së ujit nga burimi në fshatin Shum, autoritetet hetuese gjetën makina pune të dy personave juridikë nga Veleshta të cilët po kryenin thyerje, gërmim dhe transport të shkëmbinjve në shkallë të gjerë në afërsi të menjëhershme të burimeve, njofton Prokuroria, transmeton Portalb.mk.
“Për shkak të dyshimeve për vepra penale – Shfrytëzim i paligjshëm i burimeve minerale sipas nenit 225-a dhe Ndotje e ujit të pijshëm sipas nenit 219 të Kodit Penal, prokurori publik kompetent menjëherë i paraqiti propozim gjyqtarit të procedurës paraprake për përcaktimin e masave paraprake, ndalimin e personave juridikë për të vizituar parcelat ku po gërmonin dhe ndalimin e tyre për të ndërmarrë çdo aktivitet pune në zonë.
Prokuroria Themelore Publike e Strugës vazhdon të ndërmarrë veprime për të siguruar prova dhe për të hetuar përgjegjësinë e mundshme penale në lidhje me ndotjen e madhe të burimeve në Shum nga të cilat furnizohet me ujë të pijshëm zona e qytetit të Strugës”, thuhet në njoftimin e Prokurorisë.
Kujtojmë se më 13 shkurt, Prokuroria Themelore Publike e Strugës ka hapur lëndë për të hetuar ndotjen e madhe të ujit të pijshëm në zonën e Strugës dhe veprat e mundshme penale kundër mjedisit. Në bashkëpunim me Ministrinë e Brendshme, është urdhëruar inspektim në fshatin Shum, ku ndodhen burimet e ujit.
Prokuroria atëherë, tha se në koordinim me Ministrinë e Brendshme – NjPB Strugë, është lëshuar urdhër që policia gjyqësore të inspektojë një vendndodhje në fshatin Shum, ku ndodhen burimet nga të cilat furnizohet me ujë të pijshëm zona e qytetit të Strugës.
