Greta Thunberg do të lundrojë për në Gaza me ndihma të reja humanitare
Aktivistja suedeze për klimën, Greta Thunberg, do të jetë pjesë e flotiljes që do të niset sot nga Barcelona me ndihma të reja për Gazën. Anijet, raporton Guardian, do të nisen nga qyteti portual spanjoll për të hapur një korridor humanitar dhe për të ndaluar gjenocidin e vazhdueshëm kundër popullit palestinez, tha Flotilja Globale Sumud.
Ata nuk treguan se sa anije do të niseshin ose kohën e saktë të nisjes. Flotilja pritet të mbërrijë në enklavën bregdetare të shkatërruar nga lufta në mesin e shtatorit.
“Ky do të jetë misioni më i madh i solidaritetit në histori, me më shumë njerëz dhe më shumë anije sesa të gjitha përpjekjet e mëparshme të kombinuara,” u tha aktivisti brazilian Tiago Avila gazetarëve në Barcelonë javën e kaluar.
Organizatorët thonë se dhjetëra anije të tjera pritet të nisen nga Tunizia dhe portet e tjera të Mesdheut më 4 shtator.
Aktivistët gjithashtu do të organizojnë demonstrata të njëkohshme dhe protesta të tjera në 44 vende në solidaritet me popullin palestinez, shkroi në Instagram Thunberg, e cila është pjesë e bordit drejtues të flotiljes.
Përveç Thunberg, flotilja do të përfshijë aktivistë nga disa vende, ligjvënës evropianë dhe figura publike si ish-kryetarja e bashkisë së Barcelonës, Ada Colau.
“Ne e kuptojmë se ky është një mision i ligjshëm sipas ligjit ndërkombëtar”, u tha gazetarëve në Lisbonë javën e kaluar ligjvënësja portugeze e krahut të majtë Mariana Mortagua, e cila do t’i bashkohet misionit.
Izraeli tashmë ka bllokuar dy përpjekje të aktivistëve për të dërguar ndihma me anije në Gaza, në qershor dhe korrik. Në qershor, 12 aktivistë në anijen me vela Madeleine u ndaluan nga forcat izraelite 185 kilometra në perëndim të Gazës. Pasagjerët, përfshirë Thunberg, u ndaluan dhe përfundimisht u deportuan. Në korrik, 21 aktivistë nga 10 vende u ndaluan ndërsa përpiqeshin t’i afroheshin Gazës me një anije tjetër, “Khandala”.
