Gjyshja franceze e dy fëmijëve të vrarë në Gaza ngre padi kundër Izraelit për gjenocid
Gjyshja franceze e dy fëmijëve të vrarë në një sulm ajror izraelit në Gaza ngriti një padi në Francë sot, duke akuzuar autoritetet izraelite për gjenocid, krime kundër njerëzimit dhe vrasje, transmeton Anadolu.
Jacqueline Rivault, banore e komunës Vitry-sur-Seine pranë Parisit, dorëzoi padinë prej 48 faqesh sot nëpërmjet avokatit të saj, Arie Alimi, në njësinë gjyqësore franceze që merret me krimet kundër njerëzimit, raportoi e përditshmja franceze Liberation.
Padia kërkon emërimin e një gjyqtari hetues. Lidhja Franceze për të Drejtat e Njeriut (LDH) ka njoftuar qëllimin e saj për t’iu bashkuar çështjes.
Çështja përqendrohet në vdekjen e fëmijëve Janna dhe Abderrahim Abudaher, të moshës 6 dhe 9 vjeç, të cilët u vranë më 24 tetor 2023, kur një shtëpi në Gazën veriore u godit nga dy raketa që thuhet se u lëshuan nga një avion luftarak izraelit F-16. Vëllai i tyre Omar dhe nëna, Yasmine Z., u plagosën gjithashtu në sulmin ajror.
Sipas padisë, familja kishte ikur nga apartamenti i tyre ditë më parë për shkak të bombardimeve të vazhdueshme dhe ishte zhvendosur në strehimore tjetër përpara se të bëhej cak i sulmit në një shtëpi midis Falluxhës dhe Beit Lahias. Abderrahimi u vra menjëherë, ndërsa Janna vdiq pak pasi u dërgua në spital.
Padia thotë se sulmi ishte pjesë e një fushate më të gjerë izraelite që synonte “eliminimin e popullsisë palestineze” dhe akuzon kryeministrin izraelit Benjamin Netanyahu, qeverinë e tij dhe ushtrinë izraelite për orkestrimin e sulmeve.
Edhe pse është ngritur kundër personave të panjohur, padia përmend konkretisht Netanyahun dhe ushtrinë izraelite.
Franca mund të pretendojë juridiksion për shkak të kombësisë franceze të viktimave. Ndërsa iniciativa të ngjashme ligjore në Francë nuk kanë pasur sukses në të kaluarën, ky rast mund t’i detyrojë gjykatat franceze të vendosin mbi akuzat për gjenocid, të cilat Izraeli i ka hedhur poshtë me forcë.
Nëna e fëmijëve, Yasmine Z., është subjekt i një urdhri arresti të lëshuar nga Franca në vitin 2019 pasi u dënua në mungesë për financim të terrorizmit. U zbulua se u kishte dërguar para anëtarëve të Xhihadit Islam Palestinez dhe Hamasit midis viteve 2012 dhe 2013.
Ky veprim ligjor vjen mes presionit ndërkombëtar në rritje mbi Izraelin për shkak të fushatës së tij ushtarake në Gaza, e cila filloi më 7 tetor 2023.
Që atëherë, gati 54.700 palestinezë, kryesisht civilë, janë vrarë në sulmet izraelite, sipas Ministrisë së Shëndetësisë së Gazës, shifrat e së cilës konsiderohen të besueshme nga OKB-ja.
Gjykata Ndërkombëtare Penale (GJNP) ka lëshuar urdhra arresti për Netanyahun dhe ish-Ministrin e Mbrojtjes Yoav Gallant për krime lufte dhe krime kundër njerëzimit. Organizatat ndërkombëtare të të drejtave të njeriut, përfshirë Amnesty International, Human Rights Watch dhe Federatën Ndërkombëtare për të Drejtat e Njeriut, e kanë akuzuar Izraelin për kryerjen e akteve të gjenocidit në Gaza.
Në janar 2024, Gjykata Ndërkombëtare e Drejtësisë (GJND) urdhëroi Izraelin të merrte të gjitha masat për të parandaluar gjenocidin, ndërsa shefi humanitar i OKB-së i kërkoi udhëheqësve botërorë në maj të vepronin shpejt për të ndaluar mizoritë masive.
