Gjykata belge gjobit kompaninë amerikane të mediave sociale X për shpërndarje të videove seksuale pa pëlqim
Një gjykatë belge ka shpallur fajtore kompaninë X International Unlimited, degën evropiane të kompanisë amerikane të mediave sociale X, për shpërndarjen pa pëlqim të imazheve intime, transmeton Anadolu.
Sipas agjencisë së lajmeve Belga, Gjykata Penale e Brukselit i vendosi kompanisë një gjobë prej 24 mijë eurosh, megjithëse vendimi mund të kundërshtohet me apel.
Rasti lidhet me një video prej gjashtë sekondash nga viti 2020 që tregonte një grua belge duke u përdhunuar, e cila u shpërnda në rrjetet sociale e integruar brenda një videoje më të gjatë.
Viktima, e cila raportoi qarkullimin e videos, iu drejtua Institutit për Barazinë e Grave dhe Burrave në Belgjikë për ta hequr atë nga platformat online.
Që nga korriku i vitit 2020, ky institut ka autoritetin të ofrojë mbështetje ligjore për individët, imazhet intime të të cilëve shpërndahen pa pëlqim.
Instituti kontaktoi disa kompani të mediave sociale; shumica e hoqën materialin, por X vonoi veprimin.
Pasi instituti paraqiti raportime duke pretenduar shkelje të të drejtave të autorit, shpërndarje pa pëlqim të imazheve intime dhe “pornografi hakmarrëse” të lidhur me një vepër penale seksuale, platforma thuhet se e mbylli çështjen pa ndërmarrë veprime të mëtejshme.
Videoja u hoq përfundimisht vetëm pas një urdhri zyrtar nga një gjyqtar hetues.
Në mbrojtjen e saj, X argumentoi se raportimet nuk ishin mjaftueshëm të qarta, duke pretenduar se imazhet nuk ishin në mënyrë të dukshme seksuale dhe se nuk ishte e qartë nëse ato ishin krijuar apo shpërndarë pa pëlqim.
Gjykata tha se sapo përmbajtja me natyrë seksuale shpërndahet pa pëlqim, krijohet një vepër penale, pavarësisht nëse ajo është regjistruar me pëlqim apo jo, dhe se burimi i raportimit, në këtë rast instituti dhe jo vetë viktima, është i parëndësishëm.
X, në pronësi të miliarderit Elon Musk, është përballur vitet e fundit me kritika për disa incidente që lidhen me përmbajtje të papërshtatshme ose fyese, përfshirë chatbot-in e saj Grok që ka bërë komente antisemitike dhe lejimin e krijimit të imazheve “deepfake” të pahijshme pa pëlqimin e personave.
Musk i ka quajtur incidente të tilla “lajme të rreme” dhe ka pretenduar se X po shënjestrohet padrejtësisht.
