Gjermania dhe Italia thonë se nuk mund t’i bashkohen Bordit të Paqes
Gjermania dhe Italia deklaruan të premten se janë të gatshme t’i bashkohen nismës së udhëhequr nga ShBA-ja për Bordin e Paqes, por theksuan se ekzistojnë pengesa kushtetuese për një hap të tillë.
“Qëndrimi i Italisë është ky: ne jemi të gatshëm. Jemi të interesuar për këtë nismë. Mendoj gjithashtu se Gjermania mund të luajë një rol të rëndësishëm këtu, pasi bëhet fjalë për stabilizimin e Lindjes së Mesme”, tha kryeministrja italiane, Giorgia Meloni, gjatë një konference për shtyp me kancelarin gjerman Friedrich Merz në Romë.
“Puna që mund të çojë në konsolidimin e këtij armëpushimi dhe drejt propozimit të një zgjidhjeje me dy shtete, mendoj se e gjithë kjo kërkon përfshirjen tonë. Pra, ne jemi të gatshëm, por sigurisht që ekzistojnë probleme objektive. Në formën aktuale të nismës, ka probleme me Kushtetutën tonë. Do të ishte antikushtetuese për ne që të përfshihemi”, shtoi ajo.
Deklaratat e Melonit u mbështetën edhe nga kancelari gjerman. “Disa javë më parë, i thashë presidentit Trump se personalisht do të isha i gatshëm t’i bashkohesha një bordi paqeje nëse ai do të ishte një organ që, ashtu siç ishte planifikuar fillimisht, do ta shoqëronte procesin e paqes në Gaza, i cili fatkeqësisht ende nuk ka nisur”, tha Merz.
“Në formën aktuale të Bordit të Paqes, ne nuk mund t’i pranojmë strukturat e qeverisjes, vetëm për arsye kushtetuese në Gjermani, por sigurisht që jemi të gatshëm të provojmë forma të tjera, forma të reja bashkëpunimi me Shtetet e Bashkuara të Amerikës, kur bëhet fjalë për gjetjen e formateve të reja që na afrojnë më shumë me paqen në rajone të ndryshme të botës”, shtoi ai.
Bordi, i lançuar të enjten në Davos, ishte konceptuar fillimisht për ta mbikëqyrur armëpushimin dhe rindërtimin e Gazës, ku një armëpushim u arrit në tetor si pjesë e një plani me 20 pika të presidentit Trump. Megjithatë, statuti i tij e zgjeron mandatin edhe për ndërtimin e paqes në të gjitha zonat e prekura nga konflikti ose në rrezik për konflikt.
