Gaza, bombardime të rënda dhe sulme me dronë në lindje të Khan Younis-it
Një seri sulmesh ajrore kanë goditur më herët zonën lindore të Khan Younis-it. Dëshmitarët përshkruajnë bombardime të pandërprera dhe zjarr të rëndë nga dronët, që kanë shënjestruar atë që ka mbetur nga shtëpitë e banimit dhe tokat bujqësore përtej “vijës së verdhë”.
Banorët e zonës thonë se është jashtëzakonisht e vështirë të përballen me këtë realitet të ri, sidomos ata që janë kthyer pranë shtëpive të tyre afër vijës së verdhë, ku është e vendosur ushtria izraelite.
Agjencia e Mbrojtjes Civile në Gaza ka bërë të ditur se po has vështirësi të arrijë në disa vende pranë vijës së verdhë, për shkak të vazhdimit të sulmeve ajrore dhe dronëve izraelitë që patrullojnë mbi zonë.
Ndërkohë, Ministria e Shëndetësisë në Gaza ka konfirmuar se pesë palestinezë janë vrarë nga zjarri izraelit gjatë 24 orëve të fundit, ndërsa ekipet e mbrojtjes civile kanë arritur të nxjerrin trupat e 22 palestinezëve të vrarë në sulme të mëparshme izraelite.
