Gashi në pritjen e organizuar nga presidenti Begaj: Lavdia e 28 Nëntorit shërben si udhërrëfyes për të ardhmen e shqiptarëve
Kryetari i Kuvendit, Afrim Gashi ka marrë pjesë sot në pritjen e organizuar nga presidenti i Republikës së Shqipërisë, Bajram Begaj në Tiranë, për nder të 113-vjetorit të pavarësisë së Shqipërisë.
Në emër të shqiptarëve të Maqedonisë së Veriut, kryeparlamentari Gashi i ka përcjell urimet më të përzemërta presidentit Begaj me dëshirën për më shumë bashkëpunim dhe zhvillim të përbashkët.
“Në Tiranë, në një mbrëmje të mbushur me vlera historike dhe emocione vëllazërore, pata nderin të marr pjesë në pritjen shtetërore të organizuar nga presidenti i Republikës së Shqipërisë, Z. Bajram Begaj, për nder të 113-vjetorit të pavarësisë së Shqipërisë.
Kjo ngjarje, ku tradita dhe krenaria kombëtare u gërshetuan në një atmosferë festive, konfirmoi angazhimin e përbashkët për të kultivuar vlerat dhe lidhjet që na bashkojnë si popull. Lavdia e 28 Nëntorit shërben si udhërrëfyes për të ardhmen e shqiptarëve.
Në emër të shqiptarëve të Maqedonisë së Veriut, përcolla urimet më të përzemërta presidentit Begaj dhe mbarë kombit shqiptar, me dëshirën për më shumë bashkëpunim dhe zhvillim të përbashkët”, thekson Gashi në një postim në rrjetet sociale.
