Gashi në ATV: Vuçiqi po shqetësohet se po humb BDI-ja e Ali Ahmeti
Mundësia që Bashkimi Demokratik për Integrim i Ali Ahmetit t’i humb zgjedhjet në Maqedoni të Veriut ka shqetësuar Presidentin e Serbisë, Aleksandar Vuçiq. Kështu ka thënë Afrim Gashi, kreu i Alternativës, në një intervistë në emisionin “Libero” me Resul Sinanin.
“Aleksandër Vuçiqi, i cili prej Nju Jorkut dha një deklaratë për ngjarjet në Maqedoni, tha se aty po përfshihet Albin Kurti. Ai dëshiron ta fitojë BDI-në, Ali Ahmetin. Domethënë shfaqte një shqetësim shumë të madh se po humb BDI-ja e po humb Ali Ahmeti. Kjo për herë të parë ndodh. Një president i Serbisë të merakoset pse po humb Ali Ahmeti, BDI-ja. Ishte shumë indikative për ne dhe unë mendoj se është çështje e taborëve”, ka thënë Gashi.
Sipas tij, Albin Kurti ka shfaqur një mbështetje për opozitën dhe për ndryshimin.
“Këtë e ka bërë edhe në vitin 2020, kur s’ka qenë kryeministër, por edhe tash mendon se është i nevojshëm një ndryshim dhe ai normalisht që nuk don të përfshihet në zgjedhjet atje, por ka një mesazh të qartë se ai e mbështet opozitën shqiptare”, tha Gashi.
Kreu i Alternativës theksoi se anëtari i Këshillit të Përgjithshëm të Vetëvendosjes, që është nga Maqedonia, Bekim Çoku, i cili është partner i koalicionit të opozitës, do të jetë kandidat për deputet.
