FOKUS: Funksionari i BDI-së dyshohet për zjarret e pardjeshme në Shutkë
Ministria e Punëve të Brendshme dyshon një funksionar të opozitës së BDI-së për zjarrvënie të qëllimshme në rajonin e Shkupit.
Siç mëson “Fokus”, bëhet fjalë për kryetarin e degës partiake në Shuto Orizare, në shtëpinë e të cilit policia tashmë ka kryer bastisje. Sipas informacioneve jozyrtare, gjatë bastisjes janë gjetur mjete piroteknike dhe materiale të tjera të ndezshme, si dhe i është konfiskuar telefoni mobil për ekspertizë.
Burime policore kanë informuar “Fokus”-in se, ndër të tjera, po hetohet edhe dyshimi se ai është i lidhur me zjarrin në deponinë e mbeturinave në Vizbeg, pasi që zotëron pronë ngjitur me parcelën e djegur.
Sipas shkrimit të “Fokus”-it, bëhet fjalë për një funksionar të “integristëve” në nivel lokal me inicialet I.L., vëllai i të cilit është shef kabineti i drejtorit të Ndërmarrjes Publike “Parqet dhe Gjelbërimi”, që është nën juridiksionin e Qytetit të Shkupit, të udhëhequr nga Danella Arsovska.
Lidhur me këtë rast, “Fokus” njofton se i është drejtuar zyrtarisht MPB-së, por deri më tani nuk ka marrë përgjigje nëse janë zbuluar edhe prova të tjera që e lidhin personin e përmendur me zjarrvëniet në kryeqytet.
