Florida (SHBA) thyen rekord, realizon ekzekutimin e 11-të, një tjetër pritet në shtator
Florida dje kreu ekzekutimin e njëmbëdhjetë këtë vit, duke vendosur një rekord të zi në historinë e fundit.
U ekzekutua Curtis Windom (59 vjeç), i dënuar për një vrasje të trefishtë në vitin 1992, pasi Gjykata Supreme amerikane refuzoi ankesën e fundit, shkruan CBS News.
Windom u ekzekutua me injeksion në Burgun Shtetëror të Floridës. Ai u dënua për vrasjen e të dashurës së tij, Valerie Davis, nënës së saj, Mary Lubin, dhe Johnnie Leet, një person për të cilin pretendonte se i kishte para borxh.
Gjykata Supreme e Floridës refuzoi ankesën e tij, ndërsa të mërkurën e refuzoi edhe Gjykata Supreme e SHBA-së. Urdhri për ekzekutim u firmos nga guvernatori Ron DeSantis më 29 korrik.
Në përpjekjet e fundit për të parandaluar ekzekutimin, avokatët e të ndjerit u përqendruan në pretendimin e përfaqësimit të papërshtatshëm gjatë gjykimit në vitin 1992, transmeton Telegrafi.
Në kërkesën e tyre para Gjykatës Supreme të SHBA-së, ata thanë se ishte shkelur e drejta e Windomit për avokat, e garantuar nga Amendamenti i gjashtë. Ata pretenduan se avokati i tij atëherë nuk ishte i kualifikuar për çështje me dënim me vdekje dhe se vendimet duhet të anuloheshin.
Ndryshe, guvernatori DeSantis këtë vit ka firmosur një seri urdhrash për ekzekutimin e dënimit me vdekje, ndërsa është caktuar edhe ekzekutimi i dymbëdhjetë më 17 shtator. Bëhet fjalë për rastin e David Pittman (63 vjeç), i dënuar për vrasjen e tre anëtarëve të familjes së ish-gruas së tij në vitin 1990.
Rekordi i mëparshëm për numrin e ekzekutimeve në një vit ishte tetë, regjistruar në vitet 1984 dhe 2014. Në historinë më të re përfshihet periudha pas rikthimit të dënimit me vdekje në vitin 1976, katër vite pasi Gjykata Supreme e SHBA-së e kishte ndaluar përkohësisht.
Këtë vit në Floridë, përveç Windomit, janë ekzekutuar edhe Kayle Bates, Edward Zakrzewski, Michael Bell, Thomas Gudinas, Anthony Wainwright, Glen Rogers, Jeffrey Hutchinson, Michael Tanzi, Edward James dhe James Ford.
