FIA hap dyert për motorët V8, në F1 pritet edhe një ekip i ri
Formula 1 dhe rikthimi te motorët e së kaluarës ka qenë temë e nxehtë e debatit në kategorinë prestigjioze të automobilizmit. Kjo nuk është hera e parë që Federata Ndërkombëtare e Automobilizmit (FIA) dhe presidenti i saj, Mohamed Ben Sulayem, kanë hapur derën për rikthimin e motorëve V6 ose V8, dhe në garën e kaluar në Britaninë e Madhe e bënë këtë përsëri. Megjithatë, nëse këta motorë kthehen, ata do të jetë me karburant plotësisht të qëndrueshëm.
“Për ne, motori V8 është një realitet. Me ekipet tani, jam shumë optimist dhe i lumtur. FOM (Menaxhimi i Formula 1) na mbështet, ekipet po e kuptojnë se është rruga e duhur. Duhet ta bëjmë së shpejti dhe duhen tre vjet, kështu që shpresojmë se do të kemi diçka gati deri në vitin 2029, por karburanti është gjithashtu shumë i shtrenjtë, dhe duhet të jemi shumë të kujdesshëm me këtë. Transmisionet janë gjithashtu shumë të shtrenjta”, deklaroi Ben Sulayem.
Duke vazhduar temën e kostos, presidenti i FIA-s shtoi: “Motori aktual është aq i ndërlikuar sa nuk e keni idenë, dhe është i shtrenjtë. Kërkimi dhe zhvillimi po arrijnë në 200 milionë dollarë, dhe motori kushton afërsisht 1.8 deri në 2.1 milionë dollarë, kështu që do të shohim se çfarë ndodh nëse zgjedhim një V8. Shumë prodhues prodhojnë motorë V8 në makinat e tyre, kështu që komercialisht ka kuptim”, shtoi kreu i FIA-s.
Përveç motorëve V8 dhe me mbërritjen e Cadillac në Formula 1 në vitin 2026, Ben Sulayem u pyet gjithashtu për mundësinë e një ekipi të 12- të që hyn në F1 dhe se mund të jetë kinez. “Unë ende mendoj se na duhen më shumë ekipe sesa gara. Nëse ka një ekip nga Kina, le të themi, dhe FOM e miraton atë, gjë që jam absolutisht i sigurt se do ta miratonte, a nuk do të kishte më shumë para për të fituar duke pasur Kinën? Unë mendoj se po. Ne kemi një ekip të njëmbëdhjetë dhe mendoj se duhet të analizojmë performancën e tyre dhe, nëse vjen një ofertë kineze – dhe unë flas në emër të FOM – ata do ta pranonin, sepse ka të bëjë me mbajtjen e biznesit në lëvizje”, përfundoi Ben Sulayem.
