Familja e Francesca Albanese-s padit administratën Trump për sanksionet
Familja e raportueses speciale të OKB-së, Francesca Albanese, ka paditur administratën Trump për sanksionet e vendosura ndaj saj vitin e kaluar për kritikat e saj ndaj politikave të Izraelit gjatë luftës në Gaza, duke thënë se dënimet shkelin Amendamentin e Parë.
Në një padi të depozituar të mërkurën në Gjykatën e Qarkut në Uashington, bashkëshorti dhe fëmija i mitur i Albanese-s përshkruan ndikimin serioz që këto sanksione kanë pasur në jetën dhe punën e familjes, duke përfshirë edhe pamundësinë për të hyrë në shtëpinë e tyre në kryeqytetin e vendit.
“Shprehja e pikëpamjeve të Franceskës rreth fakteve ashtu siç i ka gjetur ato në konfliktin izraelito-palestinez dhe rreth punës së GJNP-së është aktiviteti thelbësor që garantohet nga Amendamenti i Parë i Kushtetutës së SHBA-së” – thuhet në padi, duke iu referuar Gjykatës Ndërkombëtare Penale.
Kjo gjykatë ka lëshuar urdhër-arreste kundër zyrtarëve izraelitë, përfshirë kryeministrin Benjamin Netanyahu, për krime lufte. “Në thelb, kjo çështje ka të bëjë me faktin nëse të paditurit mund të sanksionojnë një person, duke i shkatërruar jetën e saj dhe të të dashurve të saj, përfshirë vajzën e saj shtetase amerikane. Sepse të paditurit nuk pajtohen me rekomandimet e saj ose kanë frikë nga bindshmëria e tyre” – theksohet më tej në tekstin e padisë.
Shtëpia e Bardhë dhe Departamenti i Shtetit nuk iu përgjigjën menjëherë kërkesave për koment. Albanese, raportuesja speciale e OKB-së për Bregun Perëndimor dhe Gazën, është anëtare e një grupi ekspertësh të zgjedhur nga Këshilli i OKB-së për të Drejtat e Njeriut me 47 anëtarë në Gjenevë.
Ajo është ngarkuar me hetimin e shkeljeve të të drejtave të njeriut në territoret palestineze dhe ka folur me zë të lartë për atë që e ka përshkruar si “gjenocid” nga Izraeli kundër palestinezëve në Gaza.
Si Izraeli ashtu edhe Shtetet e Bashkuara, të cilat ofrojnë mbështetje ushtarake për aleatin e tyre të ngushtë, e kanë mohuar akuzën. Uashingtoni e kishte kritikuar atë që e kishte quajtur “fushatë lufte politike dhe ekonomike” të Albanese-s kundër SHBA-së dhe Izraelit përpara se të vendoste sanksione ndaj saj në korrik, pas një fushate të pasuksesshme presioni amerikan për ta detyruar organin ndërkombëtar ta shkarkonte atë nga posti i saj.
Menjëherë pasi u sanksionua, avokatja italiane e të drejtave të njeriut foli me Associated Press në një intervistë për efektin që do të kishte kjo tek ajo, si personalisht ashtu edhe profesionalisht.
“Vajza ime është amerikane. Kam jetuar në SHBA dhe kam disa pasuri atje. Sigurisht, kjo do të më dëmtojë. Çfarë mund të bëj? Bëra gjithçka që bëra me mirëbesim dhe duke e ditur këtë, angazhimi im ndaj drejtësisë është më i rëndësishëm sesa interesat personale” – tha Albanese.
Gjithsesi sanksionet nuk e kanë dekurajuar Albanese-n nga puna apo pikëpamjet e saj. Ajo ka vazhduar të lëshojë raporte të ashpra rreth aktivitetit të Izraelit, përfshirë një të përqendruar në atë që ajo e quajti “ekonomia gjenocidale” e vendit në territoret palestineze. /tesheshi.com/
