Ekstremisti Ben-Gvir kritikon Netanyahun për dështimin që të rikthehet në “luftë të plotë” në Gaza

Ministri izraelit i Sigurisë Kombëtare nga e djathta ekstreme, Itamar Ben-Gvir, ka kritikuar ashpër kryeministrin Benjamin Netanyahu për mosrikthimin në një “luftë të plotë” në Gaza, pasi ushtria izraelite njoftoi se do të rikthehet në zbatimin e armëpushimit.

“Sërish, Hamasi vret një nga ushtarët tanë gjatë një ‘armëpushimi’, dhe sërish, kryeministri zgjedh ta mbyllë incidentin me një ‘reagim të matur’ dhe një kthim të menjëhershëm në armëpushim, ndërkohë që vazhdon të lejojë hyrjen e ndihmave ‘humanitare’, në vend që të rikthehet në luftë të plotë dhe të synojë me shpejtësi arritjen e qëllimit kryesor: shkatërrimin e Hamasit”, shkroi Ben-Gvir në një postim në platformën X.

Ai shtoi gjithashtu se nëse Netanyahu heq dorë nga qëllimi për çmontimin e Hamasit, “atëherë qeveria nuk do të ketë më asnjë të drejtë të ekzistojë”.