Dy të vdekur nga të shtënat në SHBA, Policia identifikon autorin e dyshuar
Policia ka identifikuar të dyshuarin për të shtënat gjatë një ndeshjeje hokeji në akull të një shkolle të mesme në shtetin amerikan të Rhode Island, ku humbën jetën dy persona dhe u plagosën tre të tjerë.
Shefja e Policisë së Pawtucket, Tina Goncalves, bëri të ditur se i dyshuari, Robert Dorgan, i cili përdorte gjithashtu emrin Roberta dhe mbiemrin Esposito, vdiq nga një plagë me armë zjarri e shkaktuar vetë brenda Dennis M. Lynch Arena të dielën.
“Sipas të gjitha gjasave, kjo ishte një ngjarje e synuar, që mund të lidhet me një mosmarrëveshje familjare”, deklaroi Goncalves, pa dhënë detaje për identitetin e viktimave.
Pamjet filmike nga vendngjarja tregojnë momentin kur dëgjohen të shtëna ndërsa lojtarët ndodheshin në pistë, duke shkaktuar panik dhe largim të menjëhershëm të ekipeve nga arena. Sipas shefes së policisë, një kalimtar ndërhyri në kohë, çka “mund të ketë çuar në një përfundim të shpejtë të kësaj ngjarjeje tragjike”.
Pas incidentit, lojtarët dhe familjarët e tyre përshkruan momentet e frikës. Melissa Dunn, nëna e një prej lojtarëve, tha se pa ekipet mjekësore duke kryer reanimacion kardiopulmonar në tribuna pasi u kthye brenda për të gjetur djalin e saj.
“Fillimisht nuk e kupton çfarë po ndodh. Dëgjon vetëm zhurma të forta. Mendonim se ishin përplasjet e zakonshme në dërrasë”, tha ajo, duke shtuar se i bërtiti të birit të përkulej dhe të shmangte të shtënat.
Edhe Olin Lawrence, një lojtar i shkollës së mesme që ndodhej në akull në momentin e incidentit, rrëfeu se vrapoi drejt dhomës së zhveshjes sapo dëgjoi të shtënat. “U përplasëm pas derës dhe u përpoqëm të qëndronim të sigurt. Ishte shumë e frikshme”, u shpreh ai.
Arena ku ndodhi ngjarja ndodhet rreth pesë milje në veri të Providence dhe rreth 45 milje në jug të Boston. Autoritetet vijojnë hetimet për të zbardhur plotësisht rrethanat e ngjarjes.
