Durmishi: Inspektime të përforcuara për mbrojtjen e punëtorëve në kushte të nxehtësisë ekstreme
Ministri i Ekonomisë dhe Punës, Besar Durmishi, ka zhvilluar sot një takim pune me drejtorin e Inspektoratit Shtetëror të Punës, Gani Maksuti, për të koordinuar dhe forcuar inspektimet në terren në kuadër të temperaturave ekstreme që kanë përfshirë vendin.
“Shërbimet e inspektimit janë vendosur tashmë në të gjithë vendin, me një detyrë të qartë: mbrojtjen e shëndetit dhe të drejtave të punëtorëve”, theksoi ministri Durmishi, duke nënvizuar se punëtorët janë dhe mbeten prioriteti ynë.
Në këtë frymë, ministri rikujtoi se në seancën e 95-të të Qeverisë, të mbajtur më 22 korrik, janë miratuar masat nga Plani i Veprimit për Parandalimin e Pasojave të Valëve të Nxehtë (2025–2030).
Për periudhën 23–26 korrik 2025, u janë rekomanduar të gjithë punëdhënësve masat e mëposhtme:
Për periudhën 23–26 korrik 2025, u janë rekomanduar të gjithë punëdhënësve masat e mëposhtme:
-Përjashtimi nga puna i grave shtatzëna dhe personave mbi 60 vjeç
-Mundësimi i punës në distancë, ku të jetë e realizueshme
-Zbatimi i orarit fleksibël ose i ndarë, në përputhje me nevojat dhe mundësitë
Po ashtu, ministri theksoi domosdoshmërinë për zbatim të masave shtesë të përfshira në Planin e Veprimit:
-Ndalimi i punës në ambiente të hapura nga ora 11:00 deri në 17:00
-Sigurimi i dhomave pune me temperaturë deri në 25°C
-Aktivizimi i protokolleve të emergjencës në institucionet shëndetësore, sociale dhe arsimore
-Informimi i popullatës dhe veprimi i koordinuar institucional
“Punëdhënësit që nuk i përmbahen rekomandimeve dhe rrezikojnë shëndetin e punëtorëve do të përballen me inspektime dhe masa ligjore përkatëse,” paralajmëroi ministri Durmishi.
Në përmbyllje, ai theksoi vendosmërinë e institucionit që drejton për të garantuar kushte të sigurta pune:
“Si Ministri e Ekonomisë dhe Punës, nuk do të lejojmë që punëtori të ekspozohet ndaj rrezikut. Do të vazhdojmë me inspektime të përforcuara dhe mbështetje të fortë institucionale, me një qëllim të qartë: kushte të sigurta pune, respektim të të drejtave dhe mbrojtje të shëndetit të çdo personi.”
