Dhjetëra të vdekur në Guatemala pasi një autobus bie në humnerë
Të paktën 51 persona kanë humbur jetën në Guatemala City kur një autobus u përplas me një kangjellë mbrojtëse dhe ra në një humnerë, thanë shpëtimtarët, duke e cilësuar si një nga aksidentet rrugore më të rënda në Amerikën Latine prej vitesh.
Departamenti i zjarrfikësve të qytetit tha se trupat e 51 viktimave u nxorën nga rrënojat e autobusit të hënën. Autobusi kishte më shumë se 70 persona në bord kur ra nga një urë në një lumë të ndotur me mbetje.
Zëdhënësi i grupit të Zjarrfikësve Vullnetarë, Victor Gomez, konfirmoi se “51 trupa ndodhen në morgun e përkohshëm.”
Shpëtimtarët arritën të nxjerrin nga rrënojat edhe 10 persona të plagosur.
Presidenti i Guatemalës, Bernardo Arevalo, shprehu dhimbjen për tragjedinë dhe shpalli një periudhë të pacaktuar zie kombëtare.
“Sot është një ditë e vështirë për kombin e Guatemalës,” tha ai.
Departamenti i zjarrfikësve bëri të ditur se shoferi humbi kontrollin e autobusit dhe u përplas me disa automjete të vogla përpara se të binte në humnerë.
“Autobusi vazhdoi lëvizjen, theu një kangjellë metalike dhe ra në një humnerë rreth 20 metra (65 këmbë) të thellë, derisa arriti në lumin e ndotur me ujëra të zeza,” tha për gazetarët Carlos Hernandez nga departamenti i zjarrfikësve.
Pamjet e AFPTV treguan radhë zjarrfikësish që nxirrnin trupat nga uji i ndotur dhe i mbushur me mbeturina, duke i transportuar ata me barela lart në shpat.
Sipas mediave lokale, autobusi po udhëtonte drejt Guatemala City nga qyteti San Agustin Acasaguastlan, në departamentin El Progreso, rreth 90 kilometra (56 milje) në verilindje.
Ministri i Komunikimeve, Miguel Angel Diaz, tha se hetimet paraprake treguan se autobusi ishte 30 vjet i vjetër, por ende kishte leje për të operuar.
Ai shtoi se shkaku i aksidentit në orët e para të mëngjesit mbetet i panjohur dhe se hetuesit po shqyrtojnë nëse autobusi ishte i mbingarkuar me pasagjerë.
Aksidentet rrugore me dhjetëra viktima janë të zakonshme në Amerikën Qendrore dhe Jugore.
Në janar 2018, 52 persona humbën jetën në Peru kur një autobus ra nga një shkëmb në një plazh në veri të kryeqytetit Lima.
Në Brazil, 54 persona u vranë në mars 2015 në një aksident me një autobus turistik në shtetin jugor të Santa Catarinës.
