Dëshmi dhe video tronditëse nga pikat e ndihmave në Gaza: Punonjësit shtien qëllimisht mbi banorët e uritur

Pamje të siguruara nga agjencia e lajmeve Associated Press (AP) dhe deklarata nga njerëz me njohuri për çështjen kanë zbuluar se banorët e Gazës që presin në radhë në qendrat e shpërndarjes së ndihmës humanitare janë qëlluar nga vetë punonjësit e shpërndarjes së ndihmave, transmeton Anadolu.

Dy punonjës të kompanisë së sigurisë “UG Solutions”, e kontraktuar nga qeveria amerikane, e cila ndihmon Fondacionin Humanitar të Ndihmës në Gaza (GHF) të udhëhequr nga SHBA-ja dhe Izraeli në punën e tij në Gaza, të cilët kanë kërkuar të mos identifikoheshin, kanë folur për agjencinë e lajmeve AP.

Punonjësit kanë shpjeguar se kanë parë bomba zanore dhe gaz lotsjellës duke u hedhur rregullisht ndaj banorëve të Gazës që prisnin në radhë për të marrë ndihmë. Ata kanë treguar se kanë parë një person që punonte në pikën e shpërndarjes së ndihmës duke qëlluar rastësisht në ajër, në tokë dhe mbi civilët, dhe kanë thënë se kanë parë të paktën një person duke u qëlluar.

“Ka njerëz që po plagosen shumë rëndë pa asnjë arsye”, kanë thënë punonjësit. Njëri nga punonjësit ka thënë se plumbat, granatat zanore dhe gazi lotsjellës përdoren në pothuajse çdo shpërndarje, pavarësisht se nuk ka kërcënim.

– Pamjet e siguruara zbulojnë situatën e rëndë humanitare

Pamjet që punonjësit ia kanë dorëzuar AP-së zbulojnë situatën në pikat e shpërndarjes së ndihmave të Fondacionit amerikano-izraelit të Ndihmës Humanitare në Gaza (GHF). Pamjet tregojnë banorë të Gazës që përpiqen të marrin ndihmë humanitare mes të shtënave me armë zjarri, gazit lotsjellës dhe granata zanore.

Një video tjetër tregon disa burra që inkurajojnë njëri-tjetrin se si të shpërndajnë turmën pas të shtënave me armë zjarri. Punonjësi që ka xhiruar videon ka thënë se ka parë punonjës të tjerë duke qëlluar drejt banorëve të Gazës që sapo kishin marrë ushqimin e tyre dhe po largoheshin.

Ai ka shpjeguar se punonjësit e shpërndarjes kanë hapur zjarr me qëllimin për të “shpërndarë turmën”, por kanë vazhduar të qëllonin edhe pasi turma është shpërndarë. Një video tjetër tregon hedhjen e gazit lotsjellës drejt banorëve të Gazës që po vraponin për të mbledhur kutitë e mbetura të ushqimit në pikën e shpërndarjes.

Personi që hedh gazin lotsjellës mund të dëgjohet duke pyetur: “A ju pëlqeu shija?”. Një zyrtar tjetër që ka folur me AP-në ka pretenduar se të shtënat janë për të “garantuar sigurinë e civilëve dhe për të marrë kontrollin e pikës së shpërndarjes së ndihmës”.

– 31 për qind e shpërndarjeve të ndihmave rezultojnë në plagosje

Një raport i brendshëm i përgatitur nga Safe Reach Solutions (SRS) me seli në SHBA, një kompani e mbështetur nga GHF-ja, zbuloi se 31 për qind e shpërndarjeve të ndihmave gjatë një periudhe dyjavore në qershor kanë rezultuar me plagosje të banorëve të Gazës që kërkonin ndihmë.

Sipas dokumenteve të ndara me AP-në, gjatë asaj periudhe janë përdorur 37 bomba zanora, 27 plumba dhe 60 kanistra gazi lotsjellës.

Njëri nga punonjësit, i cili ka kërkuar anonimitet, ka thënë se çdo punonjësi që ka mbërritur në vendngjarje i është dhënë pistoletë, bomba zanore, gaz lotsjellës dhe pushkë automatike e prodhuar në Izrael që mund të qëllojë dhjetëra plumba në sekonda.

– Qendrat e shpërndarjes së ndihmave monitorohen njëkohësisht

Punonjësi ka shpjeguar se banorët e “dyshimtë” të Gazës që kanë ardhur në qendrat e shpërndarjes së ndihmave për të siguruar ushqim janë dokumentuar dhe janë raportuar në ushtrinë izraelite.

Punonjësi, i cili ka treguar për praninë e kamerave të njohjes së fytyrës në qendrat e shpërndarjes, ka thënë se analistët amerikanë dhe ushtarët izraelitë i kanë shikuar pamjet e regjistruara nga këto kamera njëkohësisht.

Ai ka thënë se kur kamerat zbulojnë një person të dyshimtë në sistem, zyrtarët izraelitë fillojnë të mbajnë shënime.

– Autenticiteti i pamjeve filmike i konfirmuar

AP-ja ka përdorur pamje ajrore për të gjeolokuar videot dhe ka punuar me dy ekspertë mjeko-ligjorë për të verifikuar autenticitetin e pamjeve filmike.

Audioeksperti Rob Maher dhe audioeksperti Steven Beck nga Universiteti i Montanës kanë thënë se nuk ka prova që zëri i videove të jetë manipuluar.