“Cikli Ancelotti” ka përfunduar: Reali kërkon një trajner të ri…
Pasi ‘Sky Sports’ raportoi në Angli, se Carlo Ancelotti do të largohet nga posti i trajnerit në Real Madrid para fundit të këtij muaji, gazeta ‘Marca’ shkruan këtë të premte se Florentino Pérez, në fakt, po shqyrton një ndryshim në drejtimin e skuadrës me synimin për Botërorin e Klubeve, që do të mbahet në verë në Shtetet e Bashkuara të Amerikës.
Sipas gazetës madrilene, Ancelotti “ka humbur shumë besueshmëri këtë sezon dhe imazhi i dobët që ai ka treguar në ndeshjet me eliminim direkt në Champions League kundër Arsenalit përforcon idenë e atyre që janë në krye, se skuadra është larguar prej kohësh nga trajneri italian dhe se cikli i tij ka përfunduar”.
Në rrethana normale, shton e njëjta gazetë, Ancelotti, të cilin e pret puna e trajnerit brazilian, do të luajë në finalen e Kupës së Mbretit, do të përfundonte La Ligën dhe do të largohet mes shumë falënderimeve. Por problemi tani lind me Botërorin për Klube, të cilin Real Madridi do ta nisë kundër Al Hilal të Jorge Jesus më 18 qershor, më pak se një muaj pas përfundimit të kampionatit spanjoll.
Duket se ‘los blancos’ tashmë po studiojnë alternativat dhe ka disa opsione në tavolinë: ecja përpara me një trajner të përkohshëm, që mund të jetë Solari ose Raul, ose punësimi i një trajneri të ri. Dhe këtu i preferuari i Florentino Pérez është Xabi Alonso.
Spanjoli është i fokusuar te Bayer Leverkusen, por pret një telefonatë nga klubi madrilen për të aktivizuar klauzolën në kontratën e tij që e lejon të largohet nëse merr oferta nga Real Madrid ose Liverpool.
Dje u fol edhe për Jurgen Klopp. Trajneri gjerman, i cili u largua nga Liverpool për t’u bërë konsulent për Red Bull, thuhet se është i lodhur nga ky rol i ri dhe do të jetë i disponueshëm, sipas UOL Esporte, për t’u rikthyer në stolin e Real Madridit ose kombëtares braziliane.
