Çfarë është Lev Tahor, kulti hebre në qendër të vëmendjes për trafikimin e fëmijëve?

Më herët këtë javë, autoritetet guatemalase, në bashkëpunim me Interpolin, arrestuan Yoel Alter, një figurë të lartë 35-vjeçare të sektit kontrovers hebre, Lev Tahor.

Alter, i veshur me mantelin karakteristik ngjyrë kafe të grupit, u ndalua jashtë një qendre shtetërore për të mitur në Guatemala City.

Ai ishte i kërkuar në Meksikë për trafikim njerëzor dhe pritet të ekstradohet së shpejti.

Arrestimi vjen në mes të një krize në përshkallëzim që përfshin Lev Tahor në Guatemalë.

Autoritetet kanë marrë të paktën 148 fëmijë në mbrojtje pas ndarjes nga prindërit e tyre, të cilët akuzohen për abuzim të rëndë, përfshirë përdhunim, sipas prokurorëve.

Operacioni i kryer në Oratorio, një zonë rurale rreth 78 kilometra në juglindje të Guatemala City, ka ringjallur shqetësimet për praktikat e grupit, të cilat janë lidhur me akuza të ngjashme në të kaluarën.

“Bazuar në deklaratat e ankuesve, provat e siguruara dhe ekzaminimet mjekësore, u arrit në përfundimin se ka forma të trafikimit të qenieve njerëzore kundër këtyre të miturve, si martesa e detyruar, abuzimi dhe krime të tjera të ngjashme,” tha Nancy Paiz, një prokurore nga Zyra Kundër Trafikimit të Njerëzve në Guatemalë.

Fëmijët mbeten nën mbrojtjen e qeverisë ndërsa hetimet vazhdojnë.

Autoritetet gjithashtu pretendojnë se disa nga nënat e reja të grupit i urdhëruan fëmijët e tyre të uriteshin, sipas udhëzimeve të liderëve të Lev Tahor, për të ushtruar presion ndaj qeverisë.

Alter është anëtari i dytë i Lev Tahor që arrestohet në Amerikën Qendrore këtë muaj.

Më herët, Jonathan Emmanuel Cardona Castillo, i cili ishte në arrati pasi përballej me akuza për abuzim me fëmijët dhe përdhunim, u kap.

Në dhjetor, policia guatemalase bastisi kompleksin e sektit në Santa Rosa, duke shpëtuar 160 të mitur dhe 40 gra.

Çfarë është Lev Tahor?

Lev Tahor është një sekt ultra-ortodoks hebre, i përshkruar gjerësisht si një kult për shkak të raporteve mbi abuzimin me fëmijët, përdhunimet, martesat e detyruara dhe trafikimin e qenieve njerëzore.

Ai u themelua në vitet 1980 nga Shlomo Helbrans në Izrael, por më vonë u zhvendos në SHBA, Kanada dhe përfundimisht në Amerikën Latine për t’u shpëtuar autoriteteve ligjore.

Sekt imponon kontroll të rreptë mbi anëtarët e tij, duke kufizuar arsimin e tyre, ndërveprimet me të huajt dhe madje duke organizuar martesa, disa prej të cilave përfshijnë të mitur.

Shumë ish-anëtarë e përshkruajnë grupin si tepër manipulues, duke e bërë të vështirë largimin nga ai.

Raportime kanë dalë mbi trafikimin e fëmijëve për martesa të paligjshme, ndërsa disa prej liderëve të grupit janë arrestuar ose hetuar për krime që variojnë nga rrezikimi i fëmijëve deri te trafikimi seksual.

Lev Tahor ka ndërruar shpesh vendndodhje për të shmangur ndjekjen ligjore, duke kaluar nga Kanadaja në Guatemalë, më pas në Meksikë dhe më tej.

Në vitin 2022, autoritetet meksikane bastisën një kamp të Lev Tahor në Chiapas, afër kufirit me Guatemalën, duke shpëtuar fëmijë dhe adoleshentë nga kushte abuzive.

Komuniteti Hebre i Guatemalës është distancuar nga Lev Tahor, duke deklaruar se sekta nuk ka asnjë lidhje me organizatën e tij.

Në një deklaratë, komuniteti shprehu mbështetjen për autoritetet guatemalase në hetimin e grupit “për të mbrojtur jetët dhe integritetin e të miturve dhe grupeve të tjera të cenueshme që mund të jenë në rrezik.”

Organizata gjithashtu u bëri thirrje “qeverive dhe trupave diplomatike të vendeve nga vijnë anëtarët e Lev Tahor që të bashkojnë forcat për të mbrojtur ata, të drejtat e të cilëve mund të jenë shkelur.” /TRT World/