Bujë në Gostivar: Dega e BDI-së nuk e pranon Taravarin si kandidat
Një zhvillim befasues dhe me pasoja të mëdha politike ka tronditur sot skenën në Gostivar. Dega lokale e Bashkimit Demokratik për Integrim (BDI) ka dalë me qëndrim të prerë: nuk e pranon Arben Taravarin si kandidat në qytetin e Gostivarit, pavarësisht zërave për një marrëveshje të mundshme politike në nivel qendror.
Burime të afërta me degën lokale të BDI-së raportojnë për tensione të brendshme dhe kundërshtime të forta ndaj idesë që Taravari, aktualisht një figurë qendrore në opozitën shqiptare dhe ish-kryetar i Komunës së Gostivarit, të mbështetet si kandidat nga BDI në zgjedhjet e ardhshme.
“Kjo është një vijë e kuqe për ne. Struktura e degës në Gostivar është e unifikuar në këtë vendim. Nuk ka vend për Taravarin në listat tona,” – deklaroi një zyrtar i lartë i degës së BDI-së për median lokale, duke kërkuar të mbetet anonim.
Ky vendim vjen në një kohë kur pritej një qasje më pragmatike nga BDI-ja pas zhvillimeve të fundit në skenën politike shqiptare në Maqedoninë e Veriut. Refuzimi i Taravarit mund të thellojë më tej ndarjet dhe të komplikojë përpjekjet për një bashkëpunim më të gjerë opozitar apo ndonjë marrëveshje të re politike.
