Brazili shet stadiumin legjendar Maracana për 320 milionë euro
Stadiumi ikonik Maracana në Rio de Janeiro, Brazil, po del në shitje. Stadiumi, një fetish për tifozët e futbollit, po shitet në një përpjekje për të ulur borxhin publik të Brazilit.
Shteti i Rio de Janeiros shpreson të mbledhë 320 milionë euro për të ulur borxhin e vet të madh prej 1.89 miliardë eurosh. Në Brazil, reagimet janë të përhapura, pasi Maracana është shoqëruar me momente kryesore në futbollin brazilian dhe atë botëror.
Ka pritur dy finale të Kupës së Botës. E para, kur Brazili humbi papritur ndaj Uruguait (1-2) në finalen më 16 korrik 1950, përpara 173,850 spektatorëve, turma më e madhe e regjistruar ndonjëherë në një ndeshje futbolli, u shoqërua me 34 vetëvrasje, 56 vdekje të papritura dhe zi kombëtare. E dyta, në vitin 2014, e solli Gjermaninë përsëri në fronin e futbollit botëror duke mposhtur Argjentinën 1-0. Sot, pas tre rinovimeve, kapaciteti i saj arrin në 78,838 vende.
Në një përpjekje për të ulur borxhin e saj, qeveria e shtetit të Rios ka vendosur të shesë stadiumin historik, ku Pele shënoi golin e 1000-të të karrierës së tij të shkëlqyer. Lajmi ka shkaktuar zemërim në Brazil. Zëdhënësi i shtetit, Rodrigo Amorim, shpjegoi se shitja është e nevojshme, pasi qeveria shpenzon 160,000 euro për ndeshje për mirëmbajtjen e “Maracana”.
Perspektiva e shitjes së “Maracana”-s është e zakonshme në praktikën e ndjekur nga qeveritë e vendeve me borxhe të mëdha, përkatësisht drejt shitjes së aseteve shtetërore. Në veçanti, vendet që përballen me spektrin e falimentimit, një shembull i kohëve të fundit i të cilit është Greqia, zgjedhin të shesin asete të rëndësishme, duke përdorur të ardhurat për të ulur borxhin e tyre.
