Bota dënon Izraelin për shkeljen e sovranitetit të Somalisë me njohjen e Somalilandit

Izraeli u bë vendi i parë që formalizoi njohjen e Somalilandit si shtet të pavarur të premten, duke shkaktuar reagime të forta ndërkombëtare.

Njoftimi i Izraelit nxiti Somalinë që të dënonte vendimin si një “sulm të qëllimshëm” ndaj sovranitetit të saj, që mund të dëmtojë stabilitetin rajonal.

Disa organizata dhe vende ndërkombëtare shprehën menjëherë kundërshtimin e tyre.

Unioni Afrikan (UA) e hodhi poshtë njohjen e Izraelit, duke paralajmëruar se kjo mund të “krijojë një precedent të rrezikshëm me pasoja të gjera për paqen dhe stabilitetin në të gjithë kontinentin.”

Kreu i UA-së, Mahamoud Ali Youssouf, theksoi se Somaliland “mbetet pjesë integrale” e Somalisë, anëtare e vjetër e Unionit Afrikan.

Presidenti amerikan Donald Trump i tha gazetës New York Post se nuk kishte plane të menjëhershme për të ndjekur shembullin e Izraelit, duke shtuar: “Gjithçka është nën shqyrtim… Ne do ta shqyrtojmë. Unë shqyrtoj shumë gjëra dhe gjithmonë marr vendime të mëdha, dhe ato rezultojnë të jenë të sakta.”

Turqia ka dënuar veprimin e Izraelit për të njohur rajonin separatist të Somalilandit si shtet të pavarur, duke e quajtur atë një veprim të paligjshëm që minon stabilitetin rajonal.

Zëdhënësi i Ministrisë së Jashtme, Oncu Keceli, deklaroi të premten se vendimi i Izraelit ishte “një shembull i ri i veprimeve të paligjshme të qeverisë së Netanyahu-t, të synuara për të krijuar paqëndrueshmëri në nivel rajonal dhe global,” duke shtuar se përbënte “ndërhyrje të qartë në punët e brendshme të Somalisë.”

Egjipti njoftoi se diplomati kryesor i tij kishte konsultuar me homologë nga Turqia, Somalia dhe Xhibuti. Zyrtarët dënuan së bashku veprimin e Izraelit dhe riafirmuan “mbështetjen e plotë për unitetin, sovranitetin dhe integritetin territorial të Somalisë.”

Sekretari i Përgjithshëm i Lidhjes Arabe, Ahmed Aboul Gheit, e përshkroi njohjen e Izraelit si “shkelje të qartë të së drejtës ndërkombëtare dhe një cenim të flagrante të parimit të unitetit dhe sovranitetit të shteteve.”

Këshilli i Bashkëpunimit të Gjirit (GCC) gjithashtu kritikoi vendimin, duke e quajtur “shkelje të rëndë të parimeve të së drejtës ndërkombëtare dhe një cenim të hapur” të sovranitetit të Somalisë.

Autoriteti Palestinez gjithashtu kritikoi Izraelin, duke vënë në dukje se më parë kishte identifikuar Somalilandin si destinacion për zhvendosjen e detyruar të palestinezëve nga Gaza dhe duke paralajmëruar kundër bashkëpunimit në këto veprime. /TRT World/