BE-ja dhe të dërguarit e huaj thirrje për veprime urgjente për paqe në Sudanin e Jugut
Sipas Ambasadës Gjermane, të dërguarit nga Bashkimi Evropian dhe një grup ambasadash të huaja kanë bërë thirrje për “veprime urgjente” për ta çuar Sudanin e Jugut drejt paqes, transmeton Anadolu.
Duke shprehur “shqetësim të madh” për gjendjen e paqes në vendin e Afrikës Lindore të martën, të dërguarit që përfaqësojnë shtetet rajonale dhe vendet kryesore donatore, i kërkuan presidentit Salva Kiir dhe zëvendëspresidentit të shkarkuar Riek Machar të ndërmarrin hapa duke përdorur dialog gjithëpërfshirës, thuhet në njoftimin e misionit diplomatik të publikuar të mërkurën vonë përmes kompanisë amerikane të mediave sociale X.
Ambasadorët dhe përfaqësuesit nga Kanadaja, Franca, Gjermania, Japonia, Norvegjia, Holanda, Sudani, Uganda, Mbretëria e Bashkuar dhe SHBA-ja, së bashku me delegacionin e BE-së, e mbështetën thirrjen, thuhet më tej.
Sudani i Jugut, vendi më i ri në botë, fitoi pavarësinë nga Sudani në vitin 2011 pas një referendumi.
Megjithatë, ai ka mbetur i zhytur në konflikt që nga dhjetori i vitit 2013, kur presidenti Salva Kiir Mayardit shkarkoi dhe akuzoi zv/presidentin e atëhershëm Riek Machar për komplotimin e një grushti shteti.
Pavarësisht marrëveshjeve të paqes të nënshkruara në vitin 2018 dhe 2022, paqëndrueshmëria vazhdon.
Në shkurt, një grup milicie i njohur si “Ushtria e Bardhë”, kryesisht i përbërë nga anëtarë të grupit etnik Nuer të Machar, pushtoi një qytet në shtetin e Nilit të Sipërm. Në përgjigje, u arrestuan disa gjeneralë dhe ministra qeveritarë të lidhur me Lëvizjen Popullore Çlirimtare të Sudanit në opozitë të Machar.
Udhëheqësi i opozitës Machar dhe disa figura të tjera të ndaluara përballen me akuza të rënda, përfshirë vrasje, tradhti dhe krime kundër njerëzimit ndërsa akuzohen për komplot, financim të aktiviteteve terroriste, shkatërrim të pronës publike dhe ushtarake si dhe nxitje të dhunës në qarkun Nasir.
