Anija libiane ‘Omar Al-Mukhtar’ i bashkohet Flotiljes Globale Sumud për të thyer bllokadën e Gazës
Anija libiane Omar Al-Mukhtar pritet të niset më 6 shtator për t’iu bashkuar Flotiljes Globale Sumud me qëllim thyerjen e bllokadës izraelite mbi Gazën, ka raportuar Libya Observer.
Sipas Arab London News, në bord do të jenë një delegacion aktivistësh libianë dhe ndërkombëtarë, si dhe pjesëmarrës nga Shtetet e Bashkuara, Kanadaja dhe Mbretëria e Bashkuar.
Mes tyre është gazetarja dhe aktivistja britanike Yvonne Ridley, e njohur për angazhimin e saj të hershëm dhe të qëndrueshëm në mbrojtje të të drejtave palestineze.
Flotilja Sumud të enjten ishte në rrugë drejt Tunizisë, prej nga synon të lidhet me flotilje të tjera përmes Mesdheut drejt Gazës.
Flotilja, e përbërë nga disa dhjetëra anije, ka për qëllim të dërgojë ushqime dhe ndihma humanitare në Gaza, ku bllokada e imponuar nga Izraeli ka shkaktuar të paktën 348 vdekje nga uria.
Zia e bukës është shpallur zyrtarisht në Gaza nga Klasifikimi i Fazave të Sigurisë Ushqimore (IPC), monitori global i urisë i mbështetur nga OKB-ja.
Aktivistë pro-palestinezë, përfshirë ambientalisten Greta Thunberg dhe aktorin e Game of Thrones, Liam Cunningham, ndodhen në flotiljen Sumud. Fjala arabe sumud do të thotë “qëndresë”.
