Algjeria kërkon që Franca të pranojë “krimet bërthamore” të kryera në tokën e saj
Kryetari i dhomës së ulët të parlamentit të Algjerisë i bëri thirrje Francës që të pranojë zyrtarisht përgjegjësinë e saj për “krimet bërthamore” franceze gjatë epokës së saj koloniale në vendin e Afrikës Veriore, transmeton Anadolu.
“Ne kërkojmë me një zë një njohje zyrtare nga Franca për përgjegjësinë e saj të plotë për këto krime bërthamore”, tha Ibrahim Boughali, Kryetari i Asamblesë Kombëtare Popullore, në një ngjarje me rastin e përvjetorit të testit të parë bërthamor të Francës në Algjeri më 13 shkurt 1960.
Algjeria nuk mund të pranojë “një njohje të thjeshtë politike, por një njohje të ndjekur nga një angazhim i qartë moral” nga Franca, shtoi ai.
Më 13 shkurt 1960, Franca kreu testin e saj të parë bërthamor, të quajtur “Gerboise Bleue”, në shkretëtirën Reggane të Algjerisë jugore. Parisi vazhdoi testet e tij bërthamore në territorin algjerian deri në vitin 1966.
Boughali tha se Franca kishte kryer 17 shpërthime bërthamore në zonë, duke lënë efekte shkatërruese që vazhdojnë edhe sot e kësaj dite.
Testet bërthamore “ishin një kapitull i errët në historinë koloniale (franceze) që vazhdon të hedhë hijen e saj, pasi efektet e saj të rrezikshme dhe shkatërruese vazhdojnë të ndikojnë në mjedisin dhe njerëzimin”, shtoi ai.
Zyrtari algjerian bëri thirrje që Franca të detyrohet të kompensojë viktimat e testeve bërthamore dhe të pastrojë mbetjet bërthamore në Algjeri.
Marrëdhëniet diplomatike midis Algjerisë dhe Francës mbeten të paqëndrueshme, veçanërisht për shkak të çështjeve të pazgjidhura që rrjedhin nga kolonizimi i Algjerisë nga Franca për 132 vjet (1830-1962). Parisi ka refuzuar të adresojë plotësisht ankesat historike që vazhdojnë të prekin shoqërinë algjeriane.
