Aksion policor, bastisje në më shumë lokacione

Aksion policor dhe kontrolle, gjatë ditës së sotme janë duke u zhvilluar në disa lokacione. Sipas Ministrisë së Punëve të Brendshme po vijon operacioni policor nga Departamenti për Luftën e Krimit të Organizuar.

Sipas informatave, kërkimet lidhen me aksionin policor që u krye këtë fundjavë, kryesisht në Haraçinë, ku u arrestuan bashkëpunëtorë të grupit kriminal të njohur si “Belanoca”.

Prokuroria Publike për Ndjekjen e Krimit të Organizuar dhe Korrupsionit ka lëshuar urdhër për zhvillimin e procedurës hetimore ndaj 18 personave të dyshuar për vrasje, bashkim kriminal, zhvatje.

Të hënën, Ministri i Punëve të Brendshme, Pançe Toshkovski, tha se aksioni policor nuk ka përfunduar dhe se do të kryhet në ditët në vijim. Sipas MPB-së, më shumë informata do të jepen pas përfundimit të aksionit.