A do ta marrë Francesca Albanese çmimin Nobel?
Nga Roald A. HYSA
“Nga ekonomia e pushtimit në ekonominë e gjenocidit”,- Françeska Albaneze
Françesca Albanese është një emër që tashmë ka hyrë në historinë e të drejtave të njeriut, si emri i një gruaje të guximshme, që nuk dorëzohet përpara vështirësive. Tashmë ajo është në mandatin e saj të dytë si Raportuese e OKB-së për të drejtat e njeriut në territoret e pushtuara palestineze.
Ajo ka denoncuar rregullisht krimet izraelite në Gaza dhe Palestinë, si dhe së fundmi ka raportuar edhe lidhjet e shumë firmave shumëkombëshve që po e ndihmojnë shtetin genocidal izraelit jo vetëm me armë, por edhe me logjistikë, duke u bërë palë me një ushtri vrastare.
Në raportin e vitit 2024, Francesca Albanese, kjo raportuese speciale për situatën e të drejtave të njeriut në territoret palestineze të pushtuara që nga viti 1967, shqyrtoi tmerret që po zhvillohen në territorin e pushtuar palestinez. Avokatja italiane e të drejtave të njeriut, e cila ka mbi dy dekada përvojë, sapo ka publikuar një raport mbi korporatat e mëdha që “pasurohen nga gjenocidi”. Pra flitet për furnitorët kryesorë të Shtetit të Izraelit në favor të poltikave të tij luftarake dhe genocidale, të cilat tashmë e kanë shqetësuar definitivisht komunitetin ndërkombëtar.
Tashmë SHBA-të kanë ndërmarrë një seri sanksionesh kundrejt saj, të cilat mund t’i sjellin pengesa, por që nuk e kanë dëmtuar aspak vendosmërinë e saj. Sanksione të tilla janë ndërmarrë edhe ndaj katër gjyqtarëve të Gjykatës Ndërkombëtare, ku tashmë çështja e Gazës dhe gjenocidi i atjeshëm e kanë polarizuar komunitetin ndërkombëtar në pro dhe kundër.
Ajo që ka nxjerrë të palarat në shesh Izraelit dhe shteteve të tjera që tashmë i kanë dalë në mbrojtje Izraelit me justifikimin që ky ka të drejtë të mbrohet ilustrohet me thënien e mësipërme të Françeska Albaneze-s: “Nga ekonomia e pushtimit në ekonominë e gjenocidit”.
Shumë shtete dhe firma të mëdha si Lockhead apo Microsoft janë furnitorë zyrtarë të shtetit gjenocidal dhe gjenerojnë të ardhura miliardare nga kjo luftë. Aftësia e kësaj gruaje të guximshme është se i ka nxjerrë me të dhëna të sakta këto lidhje. Për këtë ajo ka bërë me dijeni se ka marrë kërcënime për jetën e saj dhe të familjes.
Për çdo ditë ajo i ka nxitur shtetet dhe komunitetin ndërkombëtar që të ndërmjetësojnë paqen në Gaza, që të mbyllet kështu faqja më e zezë e historisë njerrëzore në shek. XXI. Të gjitha përpjekjet e saj meritojnë mirënjohje për dozat e larta të humanizmit që ajo përcjell. Madje një grup njerëzish kanë ndërmarrë një nismë që ajo të propozohet dhe të vlerësohet me çmimin Nobel.
Por a do ta marri kjo avokate e drejtësisë Nobel-in, megjithë akuzat që i janë ngritur asaj për antisemitizëm? Koha do ta tregojë se nga anon e drejta.
