Pentagoni pohon se ShBA-ja “nuk ka marrë pjesë” në sulmet izraelite ndaj Sirisë
Një zyrtar amerikan i mbrojtjes mohoi të martën pretendimet në mediat izraelite se sulmet ajrore të fundit të Izraelit në Siri janë kryer në koordinim me Shtetet e Bashkuara të Amerikës (ShBA).
“ShBA-ja nuk ka marrë pjesë në sulme,” tha zyrtari për Anadolu, kur u pyet mbi raportimet që pretendojnë se sulmet ajrore izraelite në Siri janë kryer “në koordinim” me ShBA-në.
“Për informacione shtesë, ju drejtojmë tek IDF,” tha zyrtari, duke iu referuar ushtrisë izraelite.
Avionët luftarakë izraelitë të martën, për ditë të dytë me radhë, kanë kryer sulme ajrore ndaj forcave siriane në jugperëndim të Sirisë.
Në një njoftim të ushtrisë izraelite thuhet se kryeministri Benjamin Netanyahu i ka urdhëruar forcat të godasin trupat dhe automjetet ushtarake siriane në Suwayda.
Ushtria tha se ka “sulmuar disa automjete të blinduara luftarake që përfshijnë tanke, transportues dhe sisteme të shumta raketash (MLRS), si dhe rrugët e aksesit, për të penguar ardhjen e konvojit në atë zonë.”
Të martën në mëngjes, ministri sirian i mbrojtjes, Murhaf Abu Qasra, shpalli një armëpushim të plotë në Suwayda pas negociatave me udhëheqësit lokalë të komunitetit.
Ushtria siriane ka filluar të tërheqë pajisjet e rënda ushtarake nga Suwayda, duke u përgatitur për t’ua dorëzuar lagjet urbane forcave të sigurisë së brendshme që janë përgjegjëse për ruajtjen e rendit dhe ligjit, sipas agjencisë së lajmeve siriane SANA.
Të hënën, mbi 30 persona u vranë dhe gati 100 të tjerë u plagosën gjatë përleshjeve ndërmjet luftëtarëve të fiseve beduine dhe milicive druze në Suwayda, sipas Ministrisë së Brendshme siriane.
