Shefja e KE-së zbulon planin e mbrojtjes prej 800 miliardë eurosh të BE-së

Përpara takimit të Këshillit Evropian që do të mbahet të enjten, presidentja e Komisionit Evropian (KE), Ursula von der Leyen prezantoi paketën e re të mbrojtjes dhe planin e riarmatimit të BE-së, një strategji ambicioze për të rritur aftësitë mbrojtëse të kontinentit që do të mobilizonte deri në 800 miliardë euro, raporton Anadolu.

“Shtetet anëtare janë të gatshme të investojnë më shumë në sigurinë e tyre nëse kanë hapësirën fiskale”, tha ajo në një letër drejtuar liderëve të BE-së, duke shtuar:

“Ne po jetojmë në kohën më të vrullshme dhe të rrezikshme, jemi në një epokë riarmatimi”.

Von der Leyen theksoi se një rritje mesatare prej 1.5 për qind në shpenzimet e mbrojtjes mund të krijojë një hapësirë fiskale deri në 650 miliardë euro gjatë katër viteve të ardhshme.

Nisma e dytë e madhe propozon një instrument të ri që ofron 150 miliardë euro kredi për shtetet anëtare për investime në mbrojtje. “Kjo ka të bëjë me shpenzimet më të mira dhe së bashku”, tha Von der Leyen, duke vënë theksin në prokurimin e përbashkët në fusha të tilla si mbrojtja ajrore dhe raketore, sistemet e artilerisë dhe dronët.

Ajo tha se qasja e re do të ndihmojë në uljen e kostove, rritjen e ndërveprimit dhe forcimin e bazës industriale të mbrojtjes të Evropës, duke rritur mbështetjen për Ukrainën.

Von der Leyen njoftoi mundësi të reja për financimin e BE-së, duke thënë: “Ne do të propozojmë mundësi dhe stimuj shtesë për vendet anëtare që të vendosin nëse duan të përdorin programe të politikës së kohezionit për të rritur shpenzimet e mbrojtjes”.

Ky hap synon të drejtojë më shumë fonde drejt investimeve të lidhura me mbrojtjen në afat të shkurtër.

Dy elementët e fundit të planit fokusohen në mobilizimin e kapitalit privat, veçanërisht nëpërmjet Unionit të Kursimeve dhe Investimeve dhe Bankës Evropiane të Investimeve.

“Ky është momenti i Evropës dhe ne duhet të jetojmë sipas tij”, tha Von der Leyen, duke riafirmuar thirrjen e saj për më shumë përgjegjësi në sigurimin e një Evrope të sigurt.

“Evropa është e gatshme të marrë përgjegjësitë e saj”, shtoi presidentja e KE-së, duke sinjalizuar një epokë të re riarmatimi për sigurinë e Evropës.