Të paktën 96 palestinezë të vrarë në sulmet ajrore izraelite në Gaza

Të paktën 96 palestinezë u vranë dhe 60 të tjerë u plagosën në sulmet ajrore izraelite në veri dhe pjesën qendrore të Rripit të Gazës sot, sipas autoriteteve lokale.

Zyra për media e qeverisë së Gazës tha se avionët luftarakë izraelitë shënjestruan disa ndërtesa banimi dhe shtëpi në qytetin verior Beit Lahia dhe kampet e refugjatëve Nuseirat dhe Bureij në Gazën qendrore.

Në një deklaratë të lëshuar nga zyra thuhet se më shumë se 72 persona humbën jetën në sulmet në Beit Lahia, ndërsa 24 palestinezë të tjerë u vranë dhe 60 të tjerë u plagosën në qendër të Gazës.

“Ushtria okupatore ishte e vetëdijshme se dhjetëra civilë të zhvendosur ishin brenda këtyre ndërtesave dhe se shumica e tyre ishin fëmijë dhe gra që ishin zhvendosur nga lagjet e tyre”, shtoi ajo.

Ajo i bëri thirrje komunitetit ndërkombëtar t’i denoncojë “këto masakra të tmerrshme kundër civilëve të zhvendosur” dhe kërkoi llogari për “qeverinë izraelite dhe mbështetësit e saj ndërkombëtarë, duke përfshirë ShBA-në, Britaninë, Gjermaninë dhe Francën”.

Një burim mjekësor më herët tha për Anadolu se avionët luftarakë izraelitë goditën një ndërtesë pesëkatëshe në zonën e Projektit Beit Lahia, duke vrarë rreth 50 njerëz dhe duke lënë disa të tjerë të bllokuar nën rrënoja.

Dëshmitarët thanë se mbi 70 civilë të zhvendosur ishin strehuar brenda ndërtesës së shënjestruar.

Një sulm izraelit shënjestroi një shtëpi tjetër në zonë, duke vrarë 15 persona dhe duke plagosur disa të tjerë, tha një burim tjetër mjekësor.

Dy palestinezë të tjerë u vranë kur avionët luftarakë izraelitë goditën një tjetër rezidencë në Beit Lahia, shtoi burimi.

Që nga 5 tetori, Izraeli ka nisur një operacion tokësor në shkallë të gjerë në veri të Gazës, duke pretenduar se qëllimi i tij është të parandalojë Hamasin që të rifitojë fuqinë në zonë. Megjithatë, zyrtarët palestinezë thonë se operacioni synon të shpopullojë me forcë veriun e Gazës dhe të krijojë një zonë tampon.

Izraeli ka vazhduar ofensivën e tij shkatërruese kundër Gazës që nga një sulm ndërkufitar nga Hamasi më 7 tetor të vitit të kaluar. Sulmet izraelite kanë vrarë më shumë se 43.700 njerëz dhe e kanë bërë enklavën pothuajse të pabanueshme.

Ofensiva ka zhvendosur pothuajse gjithë popullsinë e territorit, krahas një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.

Izraeli gjithashtu përballet me padi për gjenocid në Gjykatën Ndërkombëtare të Drejtësisë për luftën e tij vdekjeprurëse në Gaza.