Dyfishi i numrit zyrtar: Mjekët amerikanë thonë se numri i vdekjeve në Gaza është më shumë se 92,000

Rreth 45 mjekë, kirurgë dhe infermierë amerikanë, të cilët kanë dalë vullnetarë në Gaza që nga tetori i kaluar, thonë se numri i mundshëm i vdekjeve nga lufta gjithëpërfshirëse e Izraelit është “tashmë më i madh se 92,000”.

Vlerësimi përkthehet në 4.2 për qind të popullsisë totale të Gazës. Është më shumë se dyfishi i numrit të vdekjeve prej më shumë se 39,100 të raportuar nga ministria lokale e shëndetësisë.

“Duhet të vendoset një armëpushim… Ne besojmë se qeveria jonë është e detyruar ta bëjë këtë, si në bazë të ligjit amerikan ashtu edhe të ligjit ndërkombëtar humanitar,” shkruajtën mjekët në një letër të hapur drejtuar Presidentit të SHBA Joe Biden, gruas së tij Dr Jill Biden dhe Zëvendës Presidentes, Kamala Harris.

Në letër thuhej, “të gjithë në Gaza janë të sëmurë, të plagosur ose edhe tw swmurë edhe të plagosur”.

“Pothuajse çdo fëmijë nën moshën pesë vjeç, të cilin e takuam, brenda dhe jashtë spitalit, kishte një kollë dhe diarre me ujë,” thuhej në letër, duke i kujtuar presidentit amerikan se gratë shtatzëna në Gaza po lindin foshnja nën peshë, por nuk janë në gjendje të ushqehen me gji për shkak të kequshqyerjes.

Nënat e reja të kequshqyera në Gaza ushqejnë foshnjat e tyre nën peshë me formulë të bërë me ujë helmues, thuhet në letwr. “Nuk mund të harrojmë kurrë se bota i braktisi këto gra dhe foshnje të pafajshme”.

Profesionistët e mjekësisë i kërkuan udhëheqjes amerikane të kuptojë se epidemitë janë “tërbuar” në Gaza.

Zhvendosja e vazhdueshme dhe e përsëritur nga Izraeli e popullsisë së kequshqyer dhe të sëmurë të Gazës – gjysma e të cilëve janë fëmijë – në zona pa ujë të rrjedhshëm apo edhe tualete është “absolutisht tronditëse”.

Tani është “praktikisht e garantuar” që të rezultojë në “vdekje të përhapur” nga sëmundjet diarreike virale dhe bakteriale dhe pneumonia, veçanërisht te fëmijët nën moshën pesë vjeç.

“Ne shqetësohemi se mijëra të panjohur tashmë kanë vdekur nga kombinimi vdekjeprurës i kequshqyerjes dhe sëmundjeve dhe se dhjetëra mijëra të tjerë do të vdesin në muajt e ardhshëm. Shumica prej tyre do të jenë fëmijë të vegjël”, thuhet në letër.

Letra e hapur u postua në platformën e mediave sociale X nga kirurgu me bazë në Kaliforni, Feroze Sidhwa më 25 korrik.

Duke i kujtuar presidentit dhe zëvendëspresidentit të SHBA-së se fëmijët konsiderohen universalisht të pafajshëm në konfliktet e armatosura, letra thoshte se secili nga 45 profesionistët mjekësorë trajtonte fëmijët në Gaza që pësuan dhunë që “duhet të jetë drejtuar qëllimisht” ndaj tyre.

“Në mënyrë të veçantë, secili prej nesh trajtonte çdo ditë fëmijë para adoleshencës, të cilët u qëlluan në kokë dhe gjoks”, thanë ata.

Ata shprehën mosbesimin e tyre se përse dikush do të vazhdonte të armatoste vendin që “i vret qëllimisht këta fëmijë”.

Izraeli ka shkatërruar më shumë se gjysmën e burimeve të kujdesit shëndetësor të Gazës dhe ka vrarë një në çdo 40 punonjës të kujdesit shëndetësor. Në të njëjtën kohë, nevojat për kujdes shëndetësor janë rritur masivisht nga kombinimi vdekjeprurës i dhunës ushtarake, kequshqyerjes dhe sëmundjeve, shtojnë ata.

Profesionistët e mjekësisë i kërkuan Presidentit Biden dhe Zëvendës Presidentes Harris që të ndalonin mbështetjen ushtarake, ekonomike dhe diplomatike ndaj Izraelit.

“Çdo ditë që ne vazhdojmë të furnizojmë Izraelin me armë dhe municione është një ditë tjetër kur gratë copëtohen nga bombat tona dhe fëmijët vriten me plumbat tanë.”

Gjithashtu, mjekët kërkuan që popullsia e Gazës të marrë të paktën 20 litra ujë të pijshëm për person në ditë. Ata kërkuan që profesionistëve dhe pajisjeve mjekësore dhe kirurgjike t’u lejohet aksesi i plotë dhe i pakufizuar në Gaza.

“Izraeli aktualisht po bllokon çdo mjek me origjinë palestineze që të punojë në Gaza, madje edhe qytetarët amerikanë. Kjo bën një tallje me idealin amerikan se “të gjithë njerëzit janë krijuar të barabartë” dhe degradon kombin dhe profesionin tonë”, thuhej në letër.

Izraeli akuzohet për gjenocid në Gjykatën Ndërkombëtare të Drejtësisë. Izraeli bombardoi infrastrukturën me vlerë 18.5 miliardë dollarë – e barabartë me 97 për qind të PBB-së së kombinuar të Bregut Perëndimor dhe Gazës në vitin 2022 – duke u rrënuar në katër muajt e parë të luftës.

Gati dhjetë muaj luftë e plotë ka lënë të paktën 90,000 palestinezë të plagosur, ndërsa më shumë se 10,000 njerëz mbeten të varrosur nën rrënojat – që vlerësohet të jetë të paktën 26 milionë tonë që ka të ngjarë të duhen “vite për t’u hequr”.