Haiti në prag të luftës civile, kreu i bandës kërkon largimin e kryeministrit

Betejat me armë u ndezën në disa lokacione të kryeqytetit Haitian Port-au-Prince të enjten, duke çuar në vdekjen e disa oficerëve të policisë dhe duke detyruar dhjetëra linja ajrore komerciale të pezullojnë fluturimet në vendin e trazuar të Karaibeve, transmeton AlJazeera, përcjell Alfax.mk.

Aeroporti kryesor ndërkombëtar i Haitit, si dhe avionët, u vunë nën zjarr, duke detyruar linjat ajrore ndërkombëtare dhe vendase të anulojnë operimet. Shkollat, universitetet dhe bizneset gjithashtu janë detyruar të mbyllen.

Të paktën katër oficerë policie, duke përfshirë dy gra, u vranë në një sulm në një stacion pranë komunitetit të Kanaanit, sipas një sindikate policie.

Një udhëheqës i njohur i bandës tha se fraksione të shumta po diskutonin për të nisur sulmet ndaj forcave të sigurisë shtetërore në një përpjekje për të hequr kryeministrin Ariel Henry. Disa stacione policie u vunë në shënjestër të sulmit, ku dy u dogjën. Aeroporti Ndërkombëtar Toussaint Louverture ka qenë gjithashtu në shënjestër.

I njohur si “Barbecue”, kreu i bandës Jimmy Cherisier publikoi sulmin në rrjetet sociale pak para fillimit të betejave.

“Me armët tona dhe me popullin Haitian, ne do ta çlirojmë vendin”, tha ai.

Lëvizja erdhi gjatë mungesës së kryeministrit Ariel Henry, i cili ndodhet në Kenia duke u përpjekur të finalizojë detajet për dislokimin e një force të armatosur të huaj në Haiti për të ndihmuar në luftimin e bandave.

Kriza e sigurisë dhe politike

Haiti është përfshirë në një krizë sigurie dhe politike. Grupet e armatosura kanë marrë kontrollin e zonave të mëdha të vendit në vitet e fundit, duke ushtruar dhunë brutale mbi civilët dhe duke stagnuar ekonominë.

Në të njëjtën kohë, mijëra persona kanë protestuar në rrugë javët e fundit, duke kërkuar që kryeministri Henry të largohet nga pushteti siç kishte premtuar. /AlJazeera/ Alfax.mk/