Ish-presidenti amerikan Biden thotë se kishte besim të kufizuar te Netanyahu i Izraelit
Në librin e tij të ri me kujtime, ish-presidenti amerikan, Joe Biden, ka theksuar se kishte besim të kufizuar te kryeministri izraelit, Benjamin Netanyahu, transmeton Anadolu.
Sipas The Wall Street Journal, Biden pasqyron presidencën e tij në librin e ri “Promise Me, America”, të botuar pas suksesit të demokratëve në zgjedhjet afatmesme të 3 nëntorit.
Biden mbrojti vendimin e tij për të tërhequr trupat amerikane nga Afganistani në vitin 2021, duke u shprehur se besonte se ishte zgjedhja e duhur dhe se do të merrte të njëjtin vendim nëse do të ishte sërish president në rrethana të ngjashme.
Ai tha se sekretari i atëhershëm i Mbrojtjes, Lloyd Austin dhe kryetari i Shefave të Përbashkët të Shtabit, gjenerali Mark Milley, kishin shprehur shqetësime për pasojat e tërheqjes.
Biden theksoi se ishte siguruar se qeveria afgane mund të mbijetonte të paktën gjashtë muaj pas largimit të forcave amerikane, por në vend të kësaj ajo u shemb brenda pak ditësh.
SHBA-ja dhe talebanët nënshkruan një marrëveshje për tërheqjen e forcave amerikane nga Afganistani në shkurt të vitit 2020, gjatë mandatit të parë të Donald Trumpit si president.
Netanyahu “fleksibël me faktet”
Duke folur për marrëdhënien e tij me Bibi-n, siç e quante Netanyahun, Biden shkroi se kryeministri izraelit i jepte përparësi të ardhmes së tij politike afatshkurtër kundrejt interesave afatgjata të Izraelit.
“Nuk kishte shumë besim mes nesh. Gjithashtu, isha i shqetësuar për prirjet e Bibi-t, të cilat ngjasonin me ato të Trumpit. Ai mund të ishte jashtëzakonisht fleksibël me faktet dhe nuk ngurronte t’i shtrembëronte institucionet demokratike për t’u shërbyer interesave të tij personale”, shkroi Biden.
Biden tha se nuk pendohej për mbështetjen që i dha Izraelit pas ngjarjeve të 7 tetorit 2023, por shtoi se vdekja e një numri të madh palestinezësh të pafajshëm i kishte shkaktuar “trishtim të thellë”.
Duke iu referuar liderëve të tjerë botërorë, Biden e përshkroi presidentin rus, Vladimir Putin, si një person me “sjellje të zymtë” dhe pretendoi se ai përkulej qëllimisht gjatë takimeve, duke u përpjekur të dukej i painteresuar “si një adoleshent”.
Biden tha gjithashtu se besonte se përvoja e presidentit ukrainas, Volodymyr Zelenskyy, si aktor ishte “në të vërtetë një përgatitje shumë e mirë” për një lider gjatë kohës së luftës.
