Nurmagomedov ndalohet pas përleshjes me Dvalishvilin, kërkohet pezullim i përjetshëm
Luftëtari i MMA-së, Usman Nurmagomedov, dhe personat që e shoqëronin thuhet se janë ndaluar dhe marrë në pyetje nga policia në Abu Dhabi, pas një përleshjeje fizike me yllin e UFC-së, Merab Dvalishvili, në një hotel. Ngjarja ka nxitur reagime të shumta në botën e arteve marciale mikse, ku disa luftëtarë po kërkojnë ndëshkime të ashpra për të përfshirët.
Sipas gazetës The National nga Abu Dhabi, incidenti ndodhi të mërkurën në hotelin Yas Hilton. Policia është njoftuar për rastin, pasi përleshja ndodhi në një hapësirë publike dhe u regjistrua nga kamerat e sigurisë.
Autoritetet po hetojnë pretendimet për ndalimin e personave të përfshirë, si dhe raportimet se Dvalishvili nuk ka paraqitur ankesë zyrtare.
Gazetari Ariel Helwani ka bërë të ditur në platformën X se, sipas informacioneve që posedon, të gjithë pjesëmarrësit në përleshje vazhdonin të ishin nën kujdesin e autoriteteve lokale.
Ndërkohë, organizatori i RAF-it i ka thënë The National se do të flasë për incidentin në një konferencë për media të enjten.
Dvalishvili është ende i planifikuar të përballet me Marlon Moraes të shtunën në Etihad Arena. Në anën tjetër, Usman Nurmagomedov nuk ka ndeshje të planifikuar dhe ndodhet në Abu Dhabi për të mbështetur vëllain e tij të madh, Umarin, i cili do të përballet me Urijah Faberin.
Reagimet në botën e MMA-së
Pas reagimeve të Ilia Topurias dhe Conor McGregorit, edhe disa luftëtarë të tjerë kanë dalë publikisht kundër incidentit.
Sean Strickland, sipas Forbes, ka kërkuar ndalim të përjetshëm për të gjithë personat e përfshirë në sulm.
Paul Hughes e ka cilësuar ngjarjen si “krejtësisht të neveritshme”, ndërsa ka pretenduar se të njëjtët persona kishin sulmuar më parë edhe tifozët e tij në Dubai, raportoi NY Fights.
Matt Frevola ka kërkuar që sulmuesit të burgosen, ndërsa Alex Hernandez ka pretenduar se sulmi ishte i planifikuar dhe ishte filmuar paraprakisht.
Brandon Royval ka vlerësuar mikun e Dvalishvilit, mundësin 21-vjeçar gjeorgjian Saba Lazishvili, për mbrojtjen që bëri, pavarësisht se ishte në disavantazh numerik prej dhjetë kundër dy personave.
Trajneri Tim Welch ka thënë se do të dëshironte që Dvalishvili t’i padiste sulmuesit për miliona, ndërsa prezantuesja Nina-Marie Daniele ka shprehur shpresën që UFC ta përjashtojë Nurmagomedovin, sipas Sportskeeda.
Vetë Dvalishvili ka shkruar në rrjetet sociale se ishte mbajtur poshtë nga pjesëtarët e sigurisë, ndërsa ai dhe një mik i tij po goditeshin derisa ndodheshin në dysheme.
Deri më tani, Usman dhe Umar Nurmagomedov nuk kanë bërë ndonjë deklaratë publike lidhur me incidentin.
