As një javë nuk ka kaluar pas humbjes së pushtetit, Vuçiq akuzon studentët për përndjekje politike
Presidenti i deritanishëm i Serbisë dhe lideri i Partisë Përparimtare Serbe (SNS), Aleksandar Vuçiq, ka akuzuar lëvizjen studentore për përndjekje politike dhe presion ndaj institucioneve, pesë ditë pasi lista e tij humbi zgjedhjet parlamentare.
Në një intervistë për televizionin Informer, Vuçiqi foli për humbjen zgjedhore, zhvillimet politike pas saj dhe pasojat e mundshme ekonomike, duke pretenduar se tri fabrika kanë paralajmëruar largimin nga Serbia.
“Me siguri, kjo është mbrëmja kur e kam më së vështiri të flas. Gjithmonë jam ndier mirë te ju në Informer, por sonte erdha me një lak në fyt”, tha Vuçiqi në fillim të intervistës.
Ai tregoi se rezultatet e para të zgjedhjeve nisën të mbërrinin rreth orës 20:00 dhe se, pasi kuptoi se lista e tij po humbiste, i telefonoi bashkëpunëtorët e afërt për t’i njoftuar se do ta pranonte publikisht humbjen.
Vuçiqi tha se politikanët duhet të dinë të pranojnë humbjen dhe t’i urojnë kundërshtarët për fitoren, duke pretenduar se pranimi i rezultateve nga ana e tij ndihmoi në ruajtjen e stabilitetit në Serbi, shkruan index.hr.
Ai kritikoi Listën Studentore, e cila fitoi zgjedhjet parlamentare, duke e akuzuar për presion politik dhe shkelje të sundimit të ligjit.
Vuçiq pretendoi se përfaqësuesit e saj po ushtrojnë presion ndaj policisë, prokurorisë dhe institucioneve të tjera, si dhe po përpiqen të frikësojnë anëtarët e SNS-së.
Kreu i SNS-së kritikoi gjithashtu veprimet policore ndaj anëtarëve të partisë së tij në Sremska Mitrovicë dhe në vende të tjera, duke i cilësuar ato si përndjekje politike.
Ai u ankua edhe për mungesën e hapësirës në transmetuesin publik RTS, të cilin e akuzoi për anshmëri politike dhe për emërime të personave të afërt me pushtetin e ri.
Në zgjedhjet e parakohshme parlamentare të 25 tetorit, Lista Studentore fitoi shumicën e votave, duke i dhënë fund dominimit shumëvjeçar të SNS-së në politikën serbe.
Sipas rezultateve preliminare, Lista Studentore fitoi 52,71 për qind të votave dhe 140 nga 250 ulëset në Kuvend, ndërsa lista e udhëhequr nga Vuçiqi mori 39,17 për qind të votave dhe 104 mandate.
Lista Studentore u formua nga lëvizja protestuese studentore që u zhvillua pas shembjes së strehës së stacionit hekurudhor në Novi Sad në nëntor të vitit 2024, ku humbën jetën 16 persona.
Pas humbjes zgjedhore, Vuçiqi ka vazhduar të kritikojë kundërshtarët politikë dhe të paralajmërojë për pasojat që, sipas tij, mund të sjellë ndryshimi i pushtetit në Serbi. /Telegrafi/
