Tre të plagosur rëndë nga shpërthimi në fabrikën “Intel” në jug të Izraelit
Të paktën tre persona u plagosën rëndë sot nga një shpërthim në një fabrikë gjysmëpërçuesish të kompanisë “Intel” në qytetin jugor izraelit Kiryat Gat, njoftuan mediat izraelite, transmeton Anadolu.
“Jerusalem Post”, duke cituar shërbimin e urgjencës izraelite “Magen David Adom”, tha se tre persona pësuan lëndime të rënda nga shpërthimi. Policia izraelite tha se shpërthimi dyshohet se është shkaktuar nga shpërthimi i një bombole gazi, raportoi gazeta.
Kimikatet e rrezikshme mund të kenë rrjedhur si rezultat i shpërthimit, njoftoi Autoriteti i Zjarrfikësve dhe Shpëtimit të Izraelit. Ekipet aktualisht po punojnë për të gjetur burimin e kimikateve dhe për të shuar zjarrin që pasoi, thuhet në raport.
Faqja izraelite e lajmeve “Ynet” raportoi se incidenti përfshin trifluorid azoti, gaz i përdorur në prodhimin e gjysmëpërçuesve, duke nxitur ekipe të specializuara të materialeve të rrezikshme të kryejnë monitorim dhe vlerësime të rrezikut.
Zjarrfikësit kanë vënë nën kontroll burimin e zjarrit, tha Autoriteti i Zjarrfikësve dhe Shpëtimit. Më herët, tetë ekipe zjarrfikëse dhe të shpëtimit janë dërguar në vendngjarje, së bashku me njësi të specializuara të materialeve të rrezikshme nga stacionet fqinje.
Shkaku i shpërthimit nuk është konfirmuar. Sipas gazetës, fabrika “Intel” në Kiryat Gat prodhon çipa gjysmëpërçues.
