Gjykata i rikthen aksesin CNN, MS NOW dhe Politico në Shtëpinë e Bardhë
Administrata Trump kishte ndaluar hyrjen e gazetarëve të tre mediave, duke i akuzuar për publikimin e informacioneve të rreme dhe rrezik për sigurinë kombëtare. Gjykata e cilësoi ndalimin si masë që mund të ketë shkelur të drejtat kushtetuese për proces të rregullt ligjor.
Një gjykatës federal ka urdhëruar administratën e presidentit Donald Trump të rikthejë menjëherë aksesin në Shtëpinë e Bardhë për tre organizata të mëdha mediatike, pasi hyrja e tyre ishte bllokuar javën e kaluar.
Gjykata federale në Distriktin e Kolumbias vendosi një urdhër të përkohshëm që detyron Shtëpinë e Bardhë të rikthejë për 14 ditë aksesin për CNN, MS NOW dhe Politico.
Gjykatësi Timothy Kelly argumentoi se këto media kishin gjasa të provonin se administrata nuk kishte respektuar “procesin e përshtatshëm ligjor” përpara se të merrte vendimin për t’u hequr lejet e hyrjes gazetarëve.
Administrata Trump: Rrezik për sigurinë kombëtare
Administrata Trump e mbrojti në gjykatë vendimin, duke pretenduar se mediat kishin publikuar informacione të rreme dhe se aktiviteti i tyre mund të përbënte kërcënim për sigurinë kombëtare.
Megjithatë, gjykatësi shprehu dyshime mbi këtë argument. Sipas tij, presidenti nuk e kishte përmendur sigurinë kombëtare kur njoftoi fillimisht ndalimin.
Gjykata theksoi gjithashtu se administrata nuk kishte paraqitur prova të mjaftueshme për të treguar se heqja e lejeve të hyrjes do të mbronte sigurinë kombëtare.
Në mbrojtje të vendimit, administrata Trump kishte cituar disa artikuj të publikuar nga këto media, përfshirë raportime mbi punimet dhe ndërtimet në Shtëpinë e Bardhë, mes tyre edhe projektin për një sallë të re ceremoniale.
Por gjykatësi vuri në dukje se në shumicën e rasteve artikujt ishin shkruar nga gazetarë që nuk kishin leje të përhershme hyrjeje në Shtëpinë e Bardhë. Për rastet e tjera, administrata, sipas gjykatës, nuk kishte treguar se zotërimi i lejes ishte i domosdoshëm për punën e reporterëve.
Media të tjera në mbështetje të padisë
Çështja ka shkaktuar reagime të gjera në mediat amerikane.
Të hënën, disa prej rrjeteve më të mëdha televizive në SHBA u tërhoqën nga sistemi i përbashkët i raportimit të Shtëpisë së Bardhë, në shenjë proteste ndaj ndalimit.
Në të njëjtën kohë, 49 organizata mediatike, mes tyre CBS News, The New York Times dhe Fox News, paraqitën një dokument ligjor në mbështetje të padisë së CNN, MS NOW dhe Politico.
Avokati Ted Boutrous, i cili përfaqëson organizatat mediatike, e cilësoi vendimin si një mbështetje të rëndësishme për lirinë e shtypit, procesin e rregullt ligjor dhe sundimin e ligjit.
Shtëpia e Bardhë ende nuk ka komentuar vendimin e gjykatës. Ndërkohë, avokatët e presidentit Trump mund të ndërmarrin hapa të mëtejshëm ligjorë.
Trump ka pasur përplasje të përsëritura me organizatat mediatike dhe administrata e tij ka ndërmarrë gjithashtu veprime ligjore kundër disa mediave, përfshirë The New York Times, The Wall Street Journal dhe BBC.
Disa prej këtyre çështjeve kanë përfunduar me marrëveshje financiare në vlerë prej miliona dollarësh, ndërsa padia e Trump kundër BBC-së vijon të jetë në proces.
