Ndihmësi i Kremlinit: Putin, Trump dhe Xi mund të zhvillojnë takim trepalësh në samitin e ardhshëm të APEC-ut
Ndihmës i presidentit rus, Yuri Ushakov, ka bërë të ditur se presidenti Vladimir Putin mund të zhvillojë një takim trepalësh me presidentin kinez, Xi Jinping dhe presidentin amerikan, Donald Trump, në samitin e ardhshëm të Bashkëpunimit Ekonomik Azi-Paqësor (APEC) në muajin nëntor, transmeton Anadolu.
Ushakov tha për Vesti se Putin dhe Xi diskutuan këtë mundësi gjatë bisedimeve në Bishkek, në margjinat e samitit të Organizatës së Bashkëpunimit të Shangait (SCO).
“Xi Jinping përmendi se Donald Trump do të marrë pjesë dhe se Vladimir Putin, me shumë gjasë, do të marrë pjesë si i ftuar”, tha Ushakov.
“Dhe nëse gjërat shkojnë sipas planit, mund të organizohet një takim mes të treve. Ose, të paktën, një takim me të gjithë do të ishte i domosdoshëm”, tha ai.
Takimi i Liderëve Ekonomik të Bashkëpunimit Ekonomik Azi-Paqësor për vitin 2026 do të mbahet në Shenzhen të Kinës më 18-19 nëntor.
Veçmas, Ushakov tha se në fund të shtatorit do të takohet me kardinalin Matteo Maria Zuppi, kryepeshkopin e Bolognas, për të diskutuar çështje humanitare që lidhen me luftën në Ukrainë.
“Megjithëse, natyrisht, preket edhe aspekti politik i çështjes”, tha ai.
“Gjëja kryesore, natyrisht, është se Vatikani, përmes kanalit të tij, po negocion me ne lidhur me të gjitha këto çështje humanitare”, shtoi Ushakov.
