Indonezi, kapet majmuni i egër pasi plagosi 17 persona
Autoritetet në Indonezi kanë kapur një majmun të egër që dyshohet se ka plagosur të paktën 17 persona gjatë një serie sulmesh njëjavore në provincën Riau, njoftuan të enjten mediat lokale, transmeton Anadolu.
Kafsha u kap në qytetin Tembilahan në Indragiri Hilir Regency pasi një ekip i përbashkët i policisë, personelit ushtarak, zjarrfikësve dhe zyrtarëve të kafshëve të egra vendosën kurthe, raportoi gazeta indoneziane JPNN.
Shefi i policisë Indragiri Hilir, Donny Eko Listianto tha se Agjencia e Ruajtjes së Burimeve Natyrore Riau kishte vendosur tre kurthe në vende që besohet se përdoreshin nga majmuni si vende fshehjeje. Kafsha u kap në njërën prej tyre.
Autoritetet besojnë se makaku i kapur ishte përgjegjës për sulmet që filluan më 25 korrik. “Jakarta Post” raportoi se 17 persona, përfshirë fëmijë dhe banorë të moshuar, ishin sulmuar që nga e enjtja pasi një trupë makakesh me bisht të gjatë (Macaca fascicularis) u shfaq rreth Tembilahan.
Një mashkull i madh i rritur dyshohet për kryerjen e sulmeve, të cilat ndodhën në rrugë, jashtë shtëpive dhe brenda disa rezidencave. Disa viktima kishin nevojë për qepje për lëndimet e tyre.
Sulmet nxitën autoritetet të urdhëronin shkollat në të gjithë distriktin Tembilahan të kalonin në mësimin në distancë për tre ditë nga e mërkura mes shqetësimeve për sigurinë e studentëve.
Sipas JPNN, zyrtarët thanë se kafsha e kapur përputhej me përshkrimet e dhëna nga viktimat dhe dëshmitarët, përfshirë madhësinë e tij, sjelljen agresive dhe një shenjë dalluese të veçantë si plagë në fytyrë.
